Shavkat Mirziyoyev 19-may kuni “O‘zbekiston Respublikasi bilan Ozarbayjon Respublikasi o‘rtasida ittifoqchilik munosabatlari to‘g‘risidagi shartnomani ratifikatsiya qilish haqida”gi qonunni imzoladi.
Ushbu qonun 2025-yil 25-fevralda Qonunchilik palatasi tomonidan qabul qilinib, 30-aprelda Senat tomonidan ma’qullangandi.
Shavkat Mirziyoyev va Ilhom Aliyev Ittifoqchilik munosabatlari to‘g‘risidagi shartnomani 2024-yil 23-avgustda Toshkentda imzolagandi. O‘shanda Ozarbayjon prezidenti O‘zbekistonga davlat tashrifini amalga oshirgandi.
Shartnoma haqida
Mazkur shartnoma ikki davlat mustaqilligi, suvereniteti, hududiy yaxlitligi va barqaror iqtisodiy rivojlanishini yanada mustahkamlashga qaratilgan davlatlararo munosabatlarning yangi bosqichini shartnomaviy-huquqiy jihatdan mustahkamlashni nazarda tutadi.
Shuningdek, shartnomada tomonlarning bir-birlariga qarshi qaratilgan hech qanday bloklar yoki ittifoqlarda qatnashmaslik hamda tomonlardan birining fikri bo‘yicha ikki davlatning strategik sherikligi va ittifoqchilik munosabatlariga zarar yetkazadigan har qanday harakatlarda ishtirok etishdan saqlanish kabi majburiyatlari belgilangan.
Qonun bilan mazkur shartnomaning ratifikatsiya qilinishi ikki mamlakat o‘rtasidagi o‘zaro ishonch, do‘stona aloqalar va strategik sheriklikni yanada mustahkamlaydi.
Izoh (0)