AQSHning Garvard universiteti sobiq xodimi rafiqasi bilan birga inson qoldiqlarini o‘g‘irlab, sotganini tan oldi. Bu haqda People xabar berdi.
Ma’lum qilinishicha, 57 yoshli Sedrik Loj Garvard tibbiyot maktabidagi morg menejeri bo‘lib ishlagan. Tekshiruv davomida u 5 yil davomida inson qoldiqlarini o‘g‘irlagani aniqlangan. Qoldiqlar o‘z jasadlarini ilm-fanga foydalanish uchun vasiyat qilgan odamlarga tegishli bo‘lgan. Universitet xodimi bosh, miya, teri va suyaklarni sotgan.
Sedrikka bu ishda xotini Deniz yordam bergan. Bir mijoz unga uch yil davomida 37 ming dollar to‘lagan va pul o‘tkazmalarida head number 7 (bosh raqam 7) va braiiiiiiins (miyalar) degan xabarlar yozgan. Bir ayol Sedrik bilan morgda uchrashib, undan ikkita yuzni olgan va bundan avvalroq teri ham sotib olgan.
Tekshiruv davomida Sedrik tadqiqot va o‘quv maqsadlarida foydalanilgan, ammo hali utilizatsiya qilinmagan jasadlarning qismlarini olgani aniqlangan.
Birinchi marta bu haqda eshitganimda, ko‘nglim aynidi. Odamlarning bunday qilishlari shunchaki jirkanchli holat. Bu aqlsizlik, tasavvur qilib bo‘lmaydigan narsa, dedi tana a’zolari sotilgan erkaklardan birining qizi. Er-xotin Lojlar hukmini kutmoqda.
Izoh (0)