Tomoshabinlar qiziqchi Shukurullo Isroilovning xush kayfiyat ulashishiga o‘rganib qolgan. Ammo ijodkor hayotda ko‘plab qiyin kunlarni boshdan kechirgan va bugungi natijalariga faqat o‘z mehnati bilan erishgan.
“Onam bechora tug‘ilganimdan quvonib ketgan”
Shukurullo Isroilov 1970-yilning 14-yanvarida Toshkent shahrida tavallud topgan. U ismi bilan tug‘ilgani va onasi uzoq vaqt dard chekkani haqida so‘zlab bergan.
— Ustozim Mirzabek Xolmedov tug‘ilishim bilan bog‘liq qiziqarli voqealarni hajviya ko‘rinishida aytib bergan. Balki muxlislar bunga eʼtibor bermagandir. Ammo haqiqatan ham dunyoga kelishim qiziq kechgan. O‘sha paytdayoq doyalar yirik odam bo‘lishimni taxmin qilgan bo‘lsa kerak. Onamni ko‘p qiynaganman, onam bir necha kun to‘lg‘oq dardini boshdan kechirgan ekan. Holdan toyib, ko‘zlari qizarib ketgan ekan. Tug‘ilishim bilan “Shukr, shukr qutuldim”, degan ekan. Shunda doyalardan biri “Bolangiz ismi bilan tug‘ildi, Shukurullo deb qo‘ying”, degan ekan, — deydi qiziqchi Shukurullo Isroilov.
“O‘likxonada ishlashga majbur bo‘lganman”
Uch yoshida otadan yetim qolgan Shukurullo Isroilovning bolaligi og‘ir o‘tgan. U maktab formasi yaroqsiz holga kelguncha kiyishga majbur bo‘lgani va daftar-kitob sotib olish uchun taʼtilda ishlagani haqida aytib berdi.
— Onam oilamizning yolg‘iz boquvchisi bo‘lgani uchun o‘quvchilik paytimdan ishlashni boshlaganman. Taʼtilda ishlab, maktab formalarim uchun pul to‘plardim. Yettinchi sinfdan boshlab 3 oylik taʼtilni limonad zavodida o‘tkazganman. Yashik tashiganim uchun 80-90 so‘m pul berishardi. Undan keyin bog‘bonchilik qilganman. Hatto maktabni bitirish arafasida darslardan keyin pochtachilik qilishga to‘g‘ri kelgan.
Onam rahmatli shifokor bo‘lishimni orzu qilib, 11-sinfni bitirganimdan keyin “ToshMI”ga hujjat topshirtirgandi. Afsuski, 5 ball yetmay talabalikka qabul qilinmaganman. Onam bekor yurmagin deb 15-kasalxonaga sanitar xodim sifatida ishga joylashtirib qo‘ygan. Bir necha oy ishlaganimdan keyin bir tanishim o‘likxonada ko‘p maosh to‘lashlari haqida aytib qolgan. Ko‘p pul bersa bo‘ldi, deb o‘lik tashishga majbur bo‘lganman, — deydi Shukurullo Isroilov.
Valijon Shamsiyev intervyularining birida Shukurullo Isroilov bir inson hayotini saqlab qolgani haqida so‘zlab bergan.
— Shukurullo akaning oilasi moddiy jihatdan qiynalgan paytlarda kasalxonada ishlashga majbur bo‘lganligi haqida eshitgandim. Yaqinda bir inson kelib minnatdorlik bildirganiga guvoh bo‘ldim. Kattaroq lavozimdagi inson ancha yillar avval ko‘richagi yorilib, shoshilinch kasalxonaga olib kelingan ekan. Aksiga olib o‘sha vaqt lift ishlamay qolgan. Shukurullo aka bemorni to‘rtinchi qavatga ko‘tarib olib chiqib, hayotini saqlab qolgan ekan.
“Onam vafot etganini to‘yda eshitdim”
Bolalikdan yetimlikda ulg‘aygan Shukurullo Isroilov 2015-yilda onasidan ham ayrildi. O‘sha kuni u Buxoroda to‘yda edi.
— 2015-yili 27-mart kuni onam rahmatli 80 yoshni qarshilagandi. Onamni sanatoriyga davolatgani yotqizgandim, ertalab u yerga borib tabrikladim. Tandir go‘sht va shirinliklar buyurtma qilib, dasturxon yozdik. Ammo uzoq qololmadim. Chunki shu kuni kechqurun Buxoroda to‘yim bor edi. To‘y qizigan paytda “Onangiz vafot etdi” degan sovuq xabar keldi. Amallab to‘yni tugatib Toshkentga qaytdim. 28-mart kuni peshinda onamga janoza namozi o‘qildi. O‘sha kuni “Mirzo” teatrining navbatdagi konsertiga start berilardi. Mirzabek akaning oldiga kelib, konsertda chiqolmasligimni aytdim. Hammaning boshi qotgan bir necha soatdan keyin konsert, sahnalarning barchasi bir-biriga uzviy bog‘liq.
Tomoshani qoldiraylik desak, chiptalar to‘liq sotilgan. Shunda ustozlar menga qanchalik og‘ir bo‘lsa ham, konsertda chiqishim kerakligini aytdi. Konsert boshlandi, odamlar kulaman deb kelgan men esa ich-ichimdan yig‘layman. Ammo muxlislarga musibatda ekanimni bildirganim yo‘q. Ammo Mirzabek aka konsert so‘ngida “Shukurullo bugun onasidan ayrildi, ammo sizlarni hurmat qilib konsertga keldi”, deganda butun zal qarsak chalgandi, — deydi Shukurullo Isroilov.
“Ayolimning ‘semiz’ degan gapi yoqqan”
Qiziqchi intervyularining birida turmush o‘rtog‘i bilan jamoat transportida tanishib qolgani haqida so‘zlab bergan.
— Yangi oyoq kiyim sotib olgan paytim: trolleybus endi jo‘nab ketayotgan bo‘lgan. Yugurib chiqib, bitta qizni oyog‘ini bosib olganman. U paytda 130 kilo edim, keyin u qiz menga qarab “Ko‘zingga qaramaysanmi, semiz!” degan. Uzr, deganman. Qarasam yoqimtoy qiz, shu bilan gaplashib qayerda o‘qishini bilib olib, o‘qish joyiga borganman.
Shundan keyin sevgi boshlanib, roppa-rosa bir yil o‘tib uylanganman. U bilan 16-noyabrda tanishgan bo‘lsam, keyingi yilning 16-noyabrida to‘yim bo‘lgan. Bilmadim, semiz degani yoqqanmi. Juda o‘qimishli, maktabni ham oltin medalga bitirgan. Hozirda Toshkent davlat stomatologiya institutida chet tillar kafedrasining mudiri, lotin tilidan dars beradi. Tibbiyot xodimlari lotin tilini bilishi juda muhim. Hamma dorilarning tarkibi, ular haqidagi maʼlumotlar lotin tilida.
Uch farzandimiz bor, ikki o‘g‘il va bir qiz. Hamma farzandlarim oliy maʼlumotli. Katta o‘g‘lim ikkita oliygohni tamomlagan. Hozirda avtomobilsozlik sohasida faoliyat yuritadi. Ikkinchi o‘g‘lim Rossiyada institutni tamomlab, yaxshi tashkilotda ishlayapti. Qizim chet tillar institutini tugatgan, hozirda farzandlariga qarab, uyda o‘tiribdi, — deydi qiziqchi.
Qiziqchi ayoli Maqsudaxondan 10 yosh kichik. Shukurullo Isroilov 1970-yilda, ayoli esa 1960-yilda tavallud topgan. Juftlikning turmush qurganiga 33 yil bo‘ldi.
“To‘ydan qaytayotib mashinada odam urib yuborganman”
Shukurullo Isroilov bir necha yil avval militsiya xodimini mashinasida urib yuborgani, hodisa oqibatida jabrlanuvchi vafot etgani haqida so‘zlab berdi.
— 1999-yili mashinada kelayotganimda mast holatdagi militsiya xodimi yo‘limga chiqib ketib, aylanib, boshi bilan tushgan asfaltga. Darhol mashinaga solib, kasalxonaga olib borganman. O‘sha yerda vafot etgan. Endi bu falokat, hech kim ko‘chaga o‘laman deb chiqmaydi. Uning aybi ichganida bo‘lgan. Kelayotganimda chayqalib, yo‘limga chiqib ketib qolgan. Endi taqdiri shunaqa ekan. Uning ayoliga qaraganman, ular asli viloyatdan bo‘lgan. Toshkentga propiska qilib berganman, uy olib berganman. Tashlab qo‘ymaganman. Bolalari katta bo‘lib qoldi hozir. Shu paytgacha boqib, rozi-rizolik qilganmiz, — deydi so‘z ustasi.
“Qiziqchi mukofot olmaydi-ku”
Shukurullo Isroilov 40 yildan buyon katta sahnada ijod qiladi. Ammo shu kungacha birorta unvonga loyiq ko‘rilmaganidan ranjishi haqida intervyularining birida aytib o‘tgan.
— Qiziqchi mukofot olmaydi-ku, qiziqchiga mukofot — xalqning olqishi. Eng keragi xalqning nazaridan qo‘ymasin.
Har bitta qiziqchining o‘z muxlisi, o‘z yo‘nalishi bor. Mana biz ham har yili konsert beramiz. Ikki yilda bir marta bo‘lsa ham konsert qilamiz. Men 3-4yildan beri “Shukur shou” qilaman. Konsertlarimning ko‘ruvchilar soni ko‘p bo‘ladi. Hech bo‘lmasa, qo‘shiqchilarga berilgandek bitta diplom berib qo‘yishsa yaxshi bo‘lardi. Bu ham bir kichik eʼtibor hisoblanadi. Xonandalar chiqib qo‘shig‘ini fonogrammada aytadi, lekin biz jonlida gapiramiz. Buning ham farqi bor. O‘zi hozirda qiziqchilar juda kam, — deydi Shukurullo Isroilov.
Shukurullo Isroilov musiqa maktabida rubob yo‘nalishida tahsil olganidan so‘ng O‘zbekiston davlat sanʼat va madaniyat instituti (Teatr fakulteti) va Sharqshunoslik instituti (Xalqaro fakultet)ni tamomlagan. Sanʼatdagi faoliyatini 1982-yildan boshlagan. Shu vaqtga qadar AQSH, Rossiya, BAA va boshqa ko‘plab davlatlarga gastrol safarlari uyushtirgan.
Izoh (0)