Тошкент ва Самарқанд вилоятида сифатсиз бензин сотган заправкаларга чора кўрилди. Бу ҳақда Рақобат қўмитаси матбуот хизмати хабар берди.
Маълум қилинишича, қўмитанинг ҳудудий бошқармалари ҳамда тегишли ташкилотлар билан ҳамкорликда ҳудудларда фаолият кўрсатаётган автомобилларга ёнилғи қуйиш шохобчаларида (АЁҚШ) сотилаётган автобензин юзасидан назорат тадбири ўтказилган.
Тадбир давомида Тошкент вилоятида фаолият олиб борувчи Black Gold Energy МЧЖ (Аи-92 ҳамда Аи-95 маркали) ҳамда Safomax Oil МЧЖ (Аи-92 маркали)ларда сотилаётган юқори октанли автобензинлардан олинган намуналарнинг сифат таҳлилида давлат стандарти талабларига мос эмаслиги аниқланган.
Самарқанд вилояти Жомбой туманида жойлашган Happy Oil МЧЖга қарашли АЁҚШда сотилаётган Аи-95 маркали автобензин ёнилғисидан олинган намуналар Тошкент марказий назорат-кимё лабораториясида текширилганда мазкур маркали автобензин сифатсиз экани аниқланган.
Юқоридаги аниқланган ҳолатларга мувофиқ, қўмитанинг ҳудудий бошқармалари томонидан “Истеъмолчиларнинг ҳуқуқларини ҳимоя қилиш тўғрисида”ги қонун талаблари бузилиши аломатлари билан 3 та хўжалик юритувчи субъектга нисбатан иш қўзғатилган. Уларга жами 22 миллион сўмга яқин пул маблағларини истеъмолчиларга қайта ҳисоб-китоб қилиш тўғрисида бажарилиши мажбурий бўлган кўрсатмалар берилган.
2025 йилнинг февралида Андижон вилоятида фаолият юритувчи 18 та хўжалик юритувчи субъектлар сифатсиз бензин ортидан 128 миллион сўмга яқин даромад қилгани аниқланганди. Ўша ойда Бухоро вилоятидаги 47 та автомобилга газ тўлдириш шохобчаларига нисбатан рақобатга қарши тил бириктиришлар юзасидан тегишли чоралар кўрилганди. Март ойида Бухорода ишламаётган заправкада 430 тоннадан ортиқ Аи-80 бензини ноқонуний сотилгани аниқланганди.
Изоҳ (0)