Toshkent va Samarqand viloyatida sifatsiz benzin sotgan zapravkalarga chora ko‘rildi. Bu haqda Raqobat qo‘mitasi matbuot xizmati xabar berdi.
Ma’lum qilinishicha, qo‘mitaning hududiy boshqarmalari hamda tegishli tashkilotlar bilan hamkorlikda hududlarda faoliyat ko‘rsatayotgan avtomobillarga yonilg‘i quyish shoxobchalarida (AYQSH) sotilayotgan avtobenzin yuzasidan nazorat tadbiri o‘tkazilgan.
Tadbir davomida Toshkent viloyatida faoliyat olib boruvchi Black Gold Energy MCHJ (Ai-92 hamda Ai-95 markali) hamda Safomax Oil MCHJ (Ai-92 markali)larda sotilayotgan yuqori oktanli avtobenzinlardan olingan namunalarning sifat tahlilida davlat standarti talablariga mos emasligi aniqlangan.
Samarqand viloyati Jomboy tumanida joylashgan Happy Oil MCHJga qarashli AYQSHda sotilayotgan Ai-95 markali avtobenzin yonilg‘isidan olingan namunalar Toshkent markaziy nazorat-kimyo laboratoriyasida tekshirilganda mazkur markali avtobenzin sifatsiz ekani aniqlangan.
Yuqoridagi aniqlangan holatlarga muvofiq, qo‘mitaning hududiy boshqarmalari tomonidan “Iste’molchilarning huquqlarini himoya qilish to‘g‘risida”gi qonun talablari buzilishi alomatlari bilan 3 ta xo‘jalik yurituvchi subyektga nisbatan ish qo‘zg‘atilgan. Ularga jami 22 million so‘mga yaqin pul mablag‘larini iste’molchilarga qayta hisob-kitob qilish to‘g‘risida bajarilishi majburiy bo‘lgan ko‘rsatmalar berilgan.
2025-yilning fevralida Andijon viloyatida faoliyat yurituvchi 18 ta xo‘jalik yurituvchi subyektlar sifatsiz benzin ortidan 128 million so‘mga yaqin daromad qilgani aniqlangandi. O‘sha oyda Buxoro viloyatidagi 47 ta avtomobilga gaz to‘ldirish shoxobchalariga nisbatan raqobatga qarshi til biriktirishlar yuzasidan tegishli choralar ko‘rilgandi. Mart oyida Buxoroda ishlamayotgan zapravkada 430 tonnadan ortiq Ai-80 benzini noqonuniy sotilgani aniqlangandi.
Izoh (0)