Тошкент вилоятининг Янгийўл шаҳридаги туғуруқхонада етти ойлик ҳомиласи бор аёл вафот этгани айтилмоқда. Бу ҳақда жамоатчиликка ошкор қилган марҳуманинг турмуш ўртоғига кўра, ўлим ҳолати 2023 йилнинг 13 ноябрь куни содир бўлган.
13 ноябрь куни соат 7:30 да шифохонага бордик. УТТга тушди. УТТда ҳаммаси яхши, оғриқларига ётади дейишди. Уч-тўрт кунда чиқиб кетади. Ётқиздим. Ўша куни кечки пайт болам ва онамни олиб, кўргани бордик. Шифохонадан ўз оёғи билан юриб чиқди. Кечки пайт ўнда телефон қилди, операцияга дори керак деди. Бориб олиб келдим. Ошқозонини ювамиз дейишди. Шундан сўнг ярим соатдан кейин юраги тўхтаган. Ўша пайтда ҳам менга дори ёзиб беришди. Бир оғиз айтишмабди. Мени ҳаммаси яхши деб алдаб ўтиришган. Онанинг юраги тўхтаганда ҳам кислород қолади-ю, болани сақлаб қолса бўларди-ку, — дейди марҳуманинг турмуш ўртоғи.
Мурожаатчи шифокорларга ишонмаслигини айтган.
Буларга қаттиқ чора кўриш керак. Керак бўлса, қамаш лозим. Ўғлим эртага онам қани деганда, жавоб беролмайман, — дейди у.
Аёлидан ажралган эркакнинг айтишича, марҳума 30 ноябрда 26 ёшга тўлар эди.
Онам куйяпти, ўғлим куйяпти. Моргдан тўғри олдим ва олиб бориб қўйдим. Дўхтирлар узр ҳам демади. Бандачилик ҳам демади, — дейди хотини ўлганини айтган эркак.
Мурожаатчи эркак президентга мурожаат қилиб, аёлининг ўлимига сабабчи бўлган шифокорлар узр сўрамаганини, маҳалла раиси ва унинг вакиллари хонадонидан хабар олмаганини айтмоқда. Айбдорларни қонуний тарзда жавобгар қилишни сўрамоқда.
“Дарё” Telegram да тарқалган видеога аниқлик киритиш мақсадида Соғлиқни сақлаш вазирлиги ахборот хизмати раҳбари Фурқат Санаев билан боғланди. Масъул видеони кўрганини, ҳомиладор аёлнинг ўлим ҳолати ҳақиқатан ҳам рўй берганини тасдиқлади.
Тошкент вилояти Соғлиқни сақлаш бошқармаси масъуллари билан суҳбатлашганимизда воқеани тасдиқлашди. Бугун ҳолатни ўрганиб, тез орада жамоатчиликка воқеа тафсилотларини маълум қиламиз, — деди Фурқат Санаев.
Изоҳ (0)