Шавкат Мирзиёев раислигида ўтказилаётган йиғилишда Ўзбекистонда ҳокимлар энди ҳар ой тарбияси оғир ёшлар билан учрашиши маълум қилинди. Бу ҳақда Президент матбуот хизмати хабар берди.
Қайд этилишича, тарбияси оғир ёшлар билан ишлаш бўйича тизим яратилгани натижасида салкам 1 миллион ушбу тоифадаги ёшларнинг ижтимоий, иқтисодий ва маиший муаммолари ҳал қилинди.
Жорий йилда ҳам 150 мингга яқин ёшлар вазирлик ва ҳудуддаги раҳбарларга номма-ном бириктирилади. Бу раҳбарлар ёшларнинг ҳаётда ўз ўрнини топиши, касбга ва хорижий тилларга ўргатиш, ишга жойлаштириш, тадбиркорлик қилиши учун ёрдам кўрсатишга масъул бўлади.
Ёшлар агентлигининг туман бўлимлари ёшлар етакчилари билан бирга ўз ҳаракат дастурини ишлаб чиқади. Ҳокимлар эса ёшлар муаммоларини ҳал қилиш, бандлигини таъминлаш бўйича ҳар ой улар билан учрашиш тизимини жорий қилади.
Йиғилишда қайд этилишича, ўтган 8 йилда ёш тадбиркорлар сони 3 карра кўпайиб, бугун бизнес вакилларининг салкам 40 фоизини ёшлар ташкил этмоқда. Ишсиз ёшлар икки карра камайди. Ишсизликдан холи маҳаллалар сони 1 минг 889 тага етди.
Мулоқот давомида хорижда ўқиб қайтган ўзбекистонлик талабалар ватанда муваффақиятли карьера қилишига ёрдам берилиши ҳам маълум қилинди. Бунга Ёшлар агентлиги ва Давлат хизматини ривожлантириш агентлиги тенг масъул бўлиши белгиланди.
Шунингдек, Ўзбекистонда энди тадбиркор ёшларга 2,5 млрд сўмгача имтиёзли кредитлар берилиши айтилди.
Изоҳ (0)