Ўзбекистонда ОТМ битирувчиларини ишга жойлашишига кўмаклашувчи “Келажакка қадам” дастури амалга оширилади. Бу ҳақда 14 февралда имзоланган президент қарорида белгиланди.
“Олий таълим ташкилотлари битирувчиларининг ишга жойлашишига кўмаклашиш бўйича қўшимча чора-тадбирлар тўғрисида”ги қарорга кўра, дастур қуйидагиларни назарда туртади:
- ўз бизнес ғояларини амалга ошириш истаги бўлган олий таълим ташкилотларининг битирувчи босқич талабалари учун бизнес ғояни тайёр лойиҳагача олиб бориш жараёнида тўлиқ ҳамроҳлик қилиш, шу жумладан, қулай шартларда молиялаштириш;
- олий таълим ташкилотларининг битирувчи ва қуйи босқич талабалари ўртасида соҳалар бўйича очиқ танловлар ўтказиш ва ғолибларни иш билан таъминлашга кўмаклашиш.
Бунда салоҳиятли иш берувчи ташкилотлар, шу жумладан, йирик корхоналарнинг олий маълумотли мутахассисларга эҳтиёжини аниқлаш ва мутахассисларга қўйиладиган талабларни шакллантириш амалиёти йўлга қўйилади.
Танлов ғолибларини салоҳиятли иш берувчи ташкилотлар буюртмасига кўра индивидуал касбий таълим дастурлари асосида касбга дастлабки тайёрлаш тадбирлари молиялаштирилади. Индивидуал касбий таълим дастурларида ишлаб чиқариш объектларида амалиёт ўташ ва чет элдаги олий таълим ташкилотларида қисқа муддатли ўқув курсларида қатнашиш имконияти яратилади.
Ўзбекистонда ёшлар ишсизлигига барҳам бериш
Шавкат Мирзиёев 14 февраль куни ёшлар билан мулоқот ўтказганида 2025 йилда Ўзбекистонда ёшлар ишсизлигига барҳам бериш ишлари янги босқичга кўтарилишини таъкидлаганди. Президент ёшларни касб ва тилга ўқитиб, юқори даромадли ишларга жойлаштириш мақсадида бу йил бандлик бўйича катта дастур қабул қилинганини, бунинг учун жами 126 триллион сўм йўналтирилаётганини айтганди.
Йиғилишда маълум қилинишича, ҳар йили меҳнат бозорига 600 мингдан ортиқ ёшлар кириб келаётгани, 2030 йилга бориб бу кўрсаткич 1 миллион нафарга етиши, бу давлат ва жамият зиммасига катта масъулият юклаши таъкидланганди. Бугунги кунда олийгоҳларни тугатаётган 90 минг ёшлар мутахассислиги бўйича иш топишда қийналаётгани, шу боис, олийгоҳ битирувчилари бандлигини таъминлаш бўйича янги тизим яратилаётгани айтилганди.
Раҳбарлар ёшлар ишсизлигининг салбий оқибатларидан, ўз вақтида банд бўлмаган ёшлар билиб-билмай номақбул ишларга қўл уриши, диний радикализм таъсирига тушиб қолиши, жиноят кўчасига кириши мумкинлигидан огоҳлантирилди.
Изоҳ (0)