Собиқ депутат, ижтимоий тармоқ фаоли Қобил Дусов қамоққа олинган. Бу ҳақда Ўзбекистон инсон ҳуқуқлари “Эзгулик” жамияти раиси Абдураҳмон Ташанов маълум қилди.
Кеча оқшомда (24 январь назарда тутилмоқда) Ўзбекистон Республикаси Ички ишлар вазирлиги жамоат фаоли Қобил Дусовни ҳибсга олибди. Менга Қобил билан бирга вазирликка олиб келинган, сўнг қўйиб юборилган шериги қўнғироқ қилди, деб ёзади “Эзгулик” жамияти раиси Facebookдаги саҳифасида.
Ташановнинг расмийларга таянишича, Дусов пробация қоидаларини бузгани учун “ичкари”га олинган.
Ички ишлар вазирлиги Дусовнинг қамоққа олинганини тасдиқлади
“Дарё” Қобил Дусовнинг Самарқандда Ички ишлар вазирлиги томонидан қўлга олинганига аниқлик киритиш мақсадида вазирлик ахборот хизмати раҳбари Шоҳрух Ғиёсов билан боғланди. Масъул таҳририятнинг бу ҳақдаги саволига жавоб берар экан, “Қонунчиликда белгиланган чора кўрилиши таъминланган”, деди.
Шоҳрух Ғиёсовнинг гапидан англашиладики, Қобил Дусов Абдураҳмон Ташанов ёзганидек, қамоққа олинган.
Дусовга нега озодликни чеклаш жазоси тайинланган эди?
2024 йилнинг 22 ноябрь куни Жиноят ишлари бўйича Чилонзор туман суди Мактабгача ва мактаб таълими вазири ўринбосари Фарҳод Боқиевнинг Қобил Дусовдан жабрланганини айтиб, судга берган шикоятини кўриб чиққанди.
Суд жараёнлари ҳақида маълумот берган Олий суд Жиноят ишлари бўйича Чилонзор туман суди Дусовнинг жиноят содир этишдаги айбини жабрланувчининг кўрсатмасидан ташқари, жиноят ишида тўпланган далиллар билан исботлаганини маълум қилганди.
Жабрланувчиларнинг аризаси, тушунтириш хатлари, гувоҳларнинг кўрсатмалари, судга доир лингвистик экспертизалар хулосалари, ёзувлар скриншоти, Facebook ижтимоий тармоғидаги “Кабул Дусов” номли профилни ва Telegram мессенжеридаги “Кобул Дусов | Расмий канал” номли канални кўздан кечириш баённомаси, судга доир комплекс экспертизалар хулосалари ҳамда жиноят иши бўйича барча тўпланган, текширилган, ишга алоқадорлиги, мақбуллиги ва ишончлилиги нуқтайи назаридан баҳоланган далиллар билан тўлиқ исботланган деб ҳисоблади, дейилганди Олий суднинг бу ҳақдаги баённомасида.
Пробация қоидалари ва унга амал қилмаслик қандай оқибатга олиб келади?
Суд ҳукмига мувофиқ Қобил Дусов вазир ўринбосарини ҳақорат қилишда айбли деб топилиб, бир йил муддатга озодликни чеклаш билан жазоланган эди.
Жиноят кодексининг 48-1-моддасига (озодликни чеклаш) асосан Дусовга сутканинг муайян вақти, яъни кеч соат 21:00 дан эрталабки соат 07:00 га қадар яшаш жойидан чиқиш чекланганди.
Бундан ташқари, айбланувчига ҳар ойда бир маротаба яшаш жойи бўйича ИИО ФМБ Пробация бўлимидан рўйхатдан ўтиб туриш ҳамда маҳкумларни назорат қилувчи органнинг розилигисиз яшаш жойини ўзгартирмаслик каби тақиқлар юкланганди.
Айнан шу талаблар пробация талаблари ҳисобланади. Бу талабларни бузган маҳкумга нисбатан Жиноят кодексининг 48-1-моддасига (озодликни чеклаш) асосан озодликни чеклаш жазосининг ўталмай қолган муддати бошқа турдаги жазо билан алмаштириши мумкин. Жазони ўташдан бўйин товлаш вақти ўталган жазо муддатига қўшиб ҳисобланмайди.
Изоҳ (0)