Бухоро ва Наманганда ҳам давлат техника университети ташкил этилади. Бу ҳақда президентнинг тегишли қарорлари қабул қилинди.
“Бухоро давлат техника университети Бухоро муҳандислик-технология институти ҳамда Бухоро табиий ресурсларни бошқариш институти негизида ташкил этилади. Муҳандислик, ишлаб чиқариш, озиқ-овқат технологияси, енгил саноат, нефть ва газ, яшил энергетика, архитектура ва қурилиш, транспорт ва логистика, агротехнология, ахборот технологиялари ва дастурлаш соҳалари бўйича, шунингдек, ҳудуднинг юқори малакали кадрларга бўлган эҳтиёжига мувофиқ олий маълумотли мутахассислар ҳамда илмий-педагогик кадрлар тайёрлаш университетнинг асосий вазифаларидан бири этиб белгиланди.
Университетда нефть ва газ муҳандислиги соҳасида Илғор муҳандислик мактаби фаолияти йўлга қўйилади.
2025/2026-ўқув йилидан:
- университет талабаларининг фанларни ўзлаштириш кўрсаткичини ва профессор-ўқитувчиларнинг фаолият самарадорлигини халқаро тажрибалар асосида баҳолаш тизими жорий этилади;
- университет профессор-ўқитувчилари ва докторантларини етакчи хорижий олий таълим ва илмий-тадқиқот ташкилотларига илмий стажировка ва малака оширишга юборилади;
- йирик ишлаб чиқариш корхоналари ва ташкилотларни университетга саноат ҳамкори сифатида бириктирилади.
2026 йил 1 январдан университетга академик, ташкилий ва молиявий мустақиллик берилади.
Наманган давлат техника университети Наманган муҳандислик-технология институти, Наманган муҳандислик-қурилиш институти ва Наманган тўқимачилик саноати институти негизида ташкил этилади. Муҳандислик, қурилиш, тўқимачилик, ахборот технологиялари ва дастурлаш, ишлаб чиқариш, қайта ишлаш ҳамда хизмат кўрсатиш соҳалари бўйича, шунингдек, ҳудуднинг юқори малакали кадрларга бўлган эҳтиёжига мувофиқ олий маълумотли мутахассислар ҳамда илмий-педагогик кадрлар тайёрлаш университетнинг асосий вазифаларидан бири этиб белгиланди.
Университетда юридик шахс мақомисиз Илғор муҳандислик мактаби фаолияти ташкил этилади.
2025/2026 ўқув йилидан иш берувчи корхона ва ташкилотларнинг реал муаммолари асосида битирув малакавий ишлари ҳамда магистрлик диссертациялари мавзулари банкини шакллантириш ва талабаларнинг битирув малакавий иши ҳамда магистрлик диссертация ҳимояларини иш берувчи корхона ва ташкилотларда ташкил этиш чоралари кўрилади.
2026/2027-ўқув йилигача университетнинг камида иккита бакалавриат таълим йўналиши ва учта магистратура мутахассислигининг халқаро тан олинган ташкилотлар аккредитациясидан ўтказилиши таъминланади.
2025 йилдан йирик ишлаб чиқариш корхоналарини университетга саноат ҳамкори сифатида бириктирилади.
Наманган муҳандислик-технология институти, Наманган муҳандислик-қурилиш институти ҳамда Наманган тўқимачилик саноати институтида таҳсил олаётган барча талабалар ўқишини университетда давом эттиради ва 2024/2025-ўқув йилидан бошлаб битирувчиларга белгиланган тартибда университет дипломи берилади.
Ўзбекистонда ташкил этилаётган техника университетлари ҳақида
Бухоро, Наманган, техника университетлари ташкил этилиши ҳақида 22 январь куни олий таълим ва илм-фан соҳасидаги устувор вазифаларга оид тақдимотда маълум қилинганди. Умуман, бу йўналишдаги 35 та муассасани йириклаштириш ҳисобига, 22 та техника университети ташкил қилинади. Шу йил охиригача яна 17 та муҳандислик мактаби очилади.
2024 йил 20 июнда бўлиб ўтган видеоселектор йиғилишида давлат раҳбари ҳар бир ҳудудда техника олийгоҳи ва илғор муҳандислик мактаблари ташкил қилиш вазифасини қўйган эди. Ҳозиргача Термиз, Андижон ва Қаршида техника университетлари ташкил бўлди. Шунингдек, 8 та муҳандислик мактаби очилди.
Изоҳ (0)