Россия ва Украина ўртасида 30 кунлик сулҳ бошланиши учун Ғарб давлатлари Киевга қурол етказиб беришни тўхтатиши керак. Бу ҳақда Кремль матбуот котиби Дмитрий Песков маълум қилди.
Агар биз ўт очишни тўхтатиш ҳақида гапирадиган бўлсак, Украина ҳар куни АҚШ ва Европа давлатларидан оладиган қурол-яроғ таъминоти билан нима қилишимиз керак?, деди у.
Песков тинчлик сулҳи кучга киришидан олдин қурол-яроғ етказиб бериш тўхтатилиши кераклигини айтди. Акс ҳолда, Украина бу даврдан сафарбарлик, ротация, янги жангчиларни тайёрлаш ва мавжуд кучларини тиклаш учун фойдаланишини даъво қилди.
Нима учун биз Украинага бундай имкониятни тақдим этишимиз керак?, деди Путиннинг матбуот котиби.
Песковнинг таъкидлашича, Россия президенти “можарони тинч ва дипломатик йўллар билан ҳал этиш учун барча саъй-ҳаракатларни амалга оширмоқда”.
Бироқ қўлимизда тинч ва демократик воситалар бўлмагани сабабли ҳарбий операция (уруш)ни давом эттиришга мажбурмиз, деди у.
Шунга қарамай, Россия АҚШ президенти Дональд Трампнинг шахсий воситачилиги вазиятни ўзгартириши мумкинлигига умид билдирди.
Умид қиламизки, Вашингтоннинг саъй-ҳаракатлари Киев позициясига бир оз мослашувчанлик ва сиёсий ирода олиб киришга ёрдам беради, деб таъкидлади Песков.
Путин “инсонпарварлик мулоҳазаларидан келиб чиқиб”, Ғалабанинг 80 йиллигини нишонлаш даврида уч кунга ўт очишни тўхтатишни эълон қилган эди. Тинчлик режими 7 май ярим тундан кучга кирган ва 11 май ярим тунгача давом этади. Украина президенти Владимир Зеленский буни “манипуляцияга уриниш” деб атаган ва янада кенгроқ қадамни — 30 кун муддатга ўт очишни тўлиқ тўхтатишни таклиф қилган.
Узоқ муддатли сулҳга чақириқ тез орада Дональд Трамп томонидан ҳам янгради. У Москва ва Киев камида бир ойга “шартларсиз” ўт очишни тўхтатиши кераклигини айтди.
Агар ўт очишни тўхтатишга риоя қилинмаса, АҚШ ва унинг ҳамкорлари қўшимча санкциялар киритади, деди Трамп.
Изоҳ (0)