Россия президенти матбуот котиби Дмитрий Песков Россиянинг Украинадаги “ҳарбий операция”си мақсадлари ўзгармаганини ва долзарблигича қолаётганини айтди. У “махсус операция”ни “урушни тўхтатишга уриниш” деб атади.
“Мақсадлар ўзгармади, уларнинг барчаси ҳаммага маълум ва долзарблигича қолмоқда. Бу демилитаризация ва денацификация қилиш, шунингдек, аллақачон Россия ҳудудига айланган ерларда яшовчи аҳоли хавфсизлигини таъминлаш, уларни тўғридан тўғри ҳужумлардан ҳимоя қилиш, уларнинг ҳаётини сақлаб қолишдан иборат”, — деди Песков конференция чоғида.
Унинг сўзларига кўра, 2014 йилда Украина расмийлари Донбасс республикасига қарши уруш бошлаган, Россия ҳозир буни тўхтатишга ҳаракат қилмоқда. “Уруш айнан ўша пайтда бошланди. Бу урушни тўхтатиш Украинадаги операциянинг мақсадларидан биридир”, — дея таъкидлади Кремль вакили.
Президент Владимир Путин 2022 йил 24 февралда “ҳарбий операция” бошланганини эълон қилар экан, унинг мақсадлари Украинани демилитаризация ва денацификация қилиш, шунингдек, Донбасс аҳолисини Украина ҳукумати томонидан амалга оширилаётган “геноцид”дан ҳимоя қилиш, деб атаганди.
Изоҳ (0)