Ўзбекистонда 2024 йил давомида тадқиқотлар ва ишланмалар учун умумий 4 триллион 581 миллиард 616 миллион сўм сарфлангани маълум қилинди.
Инновацион ривожланиш агентлигига кўра, 2024 йил давомида “Илмий ва инновацион фаолиятни ривожлантириш стратегияси”да белгиланган кўрсаткичларга эришиш бўйича қуйидаги ютуқларга эришилди:
- ҳудудларда инновация марказлари сони 216 тага етди (режага нисбатан 102,9 фоиз);
- технологик инновациялар билан шуғулланувчи маҳаллий саноат корхоналари сони 265 тани ташкил этди (101,5 фоиз);
- яратилган янги технологиялар сони 192 та (103,2 фоиз);
- йиллик рўйхатга олинган патентлар сони 165 тага етди (201,2 фоиз);
- хорижий ташкилотлар билан ҳамкорликда амалга оширилган илмий, инновацион ва технологик лойиҳалар сони 92 та (116,5 фоиз);
- рўйхатга олинган стартаплар сони 531 тага етказилди (101,1 фоиз).
Шунингдек, агентлик томонидан молиялаштирилган тижоратлаштириш ва стартап лойиҳалари доирасида хусусий сектор томонидан тадқиқот ва ишланмаларга йўналтирилган инвестициялар ҳажми деярли 800 миллион сўмга ошиб, 5 миллиард 510 миллион сўмни ташкил этди.
Бундан ташқари, илмий-тадқиқот лойиҳалари доирасида хориждан 10,82 миллион АҚШ доллари (139 миллиард 150 миллион сўмдан ортиқ) миқдорида беғараз грант маблағлари жалб қилинди.
Ўзбекистонда таълим сифатини ташқи баҳолаш билан шуғулланувчи тузилма ташкил этилади. Сўнгги йилларда таълим соҳасида хусусий секторга берилган имкониятлар туфайли 71 та хусусий олийгоҳ ва 51 та хусусий техникум ташкил этилиб, уларда 500 минг нафарга яқин талаба ва ўқувчилар таҳсил олмоқда. Бунинг натижасида мамлакатда олий таълим билан қамров 9 фоиздан 42 фоизга ошди.
Олий таълим, фан ва инновациялар вазирлиги ахборот хизмати раҳбари Назокат Абдуқундузова 2024 йилда республикада олий таълим муассасалари сони 211 тани ташкил этганини маълум қилганди. Уларнинг 112 таси давлат, 30 таси хорижий ва 69 та нодавлат олий таълим муассасалари ҳисобланади. Ўшанда 2024/25-ўқув йилида жами 1 миллион 167 минг нафардан ортиқ талаба таҳсил олиши кутилаётганини айтганди.
Олий таълим фан ва инновациялар вазирлиги маълумотларига кўра, Тошкент давлат иқтисодиёт университети, Тошкент Кимё халқаро университети, Ўзбекистон Миллий университетида энг кўп талабаларда таҳсил олмоқда.
Шавкат Мирзиёев “Янги Ўзбекистоннинг асосий устуни — билим, таълим ва тарбия бўлади”, деб таъкидлаганди. “Мамлакатимиз келажагини таълимда кўраман. Билими бор одам ҳар қандай шароитда йўлини топа олади. Агар биз сифатли таълим бера олсак, фарзандларимизнинг келажагидан хавотир олмасак ҳам бўлади”, деган эди президент таълим соҳаси вакилларини тақдирлаш маросимида.
Изоҳ (0)