Испаниянинг Салватерра де Мино шаҳрида яшовчи 42 ёшли эркак, Пабло Гонсалес, ресторанда газли сувдан бир қултум ичганидан сўнг, уч ҳафтадан бери ҳеч қандай овқат ёки суюқлик истеъмол қила олмаяпти. Бу ҳақда Oddity Central хабар берди.
Пабло Гонсалес 12 апрель куни дўстлари билан тапас услубидаги ресторанда овқатланганидан сўнг, машҳур брендга мансуб газли минерал сув, муз ва лимон бўлагини буюртма берди. Унга кўра, шиша бутилка ёпиқ ҳолатда бўлган ва ҳеч қандай шубҳали нарса кўринмаган. Аммо у сувдан илк қултумни ичганидан кейин оғзида кучли куйдирувчи оғриқни аниқ эслайди.
У дарҳол ўрнидан туриб, стаканга қараганида суюқликнинг сарғиш рангда эканини кўрди. Дўстининг Coca-Cola ичимлигидан бир қултум ичиб, тезда ҳожатхонага югуриб оғзини чайқади. У оғриқдан “кўзи қоронғилашиб” қолганини ва дўстларининг ёрдамида юришга мажбур бўлганини айтмоқда. Бошқа ичимликлар ичилганидан кейин ҳам аҳволи яхшиланмагач, тез ёрдам чақирилди.
Тез ёрдам уни Виго шаҳридаги Повиса шифохонасига олиб борди. Шифокорлар унинг ички аъзолари куйганини аниқлади ва оғриқни енгиллаштириш учун оғриқ қолдирувчи воситалар берди. Маҳаллий El Faro de Vigo газетаси билан суҳбатда Пабло унинг қизилўнгачи ва ошқозони куйишдан “қорайиб қолганини”, оғзи эса фақат тезда сув билан чайилгани туфайли камроқ зарар кўрганини айтди.
Ҳодисадан кейинги дастлабки 15 кун ичида Пабло ҳеч нарса истеъмол қила олмади. Ошқозони аста-секин тикланмоқда, бироқ шифокорлар қизилўнгач ҳали ҳам оғир шикастланганини айтмоқда. 28 апрель куни у илк бор бир қултум сув ичди, бироқ ҳали ҳам бутунлай соғайиб кетадими ёки бу қанча вақт олади номаълум.
Куйишга нима сабаб бўлганини эса ҳозирча ҳеч ким аниқ билмайди. Полиция кузатув камераларини текширган, аммо ҳеч қандай гумонли ҳолат аниқланмаган. Минерал сув солинган бутилка мусодара қилинган ва текширувга юборилган. Полиция етиб келгунча бутилка бўшатилган бўлса-да, унинг ичида қолган излар орқали сабаб аниқланиши мумкин.
Ҳозирча энг эҳтимолий тахмин бутилка ёки стаканнинг қандайдир кимёвий тозаловчи восита билан тасодифан ифлосланган бўлишидир. Бироқ ресторан эгаси бу эҳтимолни рад этмоқда.
Изоҳ (0)