Куни кеча “Муҳташам юз йил” сериалидаги султон Сулаймон роли билан танилган Ҳалит Эргенч Истанбулдаги Гези паркида бўлиб ўтган норозилик намойишлари билан боғлиқ воқеаларни тергов қилиш вақтида ёлғон кўрсатма берганликда айбланиб, бир йилу ўн ярим ой қамоқ жазосига ҳукм қилинди.
Бироқ актёрнинг аввалроқ судланмаганлиги сабабли жазо муддати номаълум муддатга кечиктирилди. Тахминларга кўра, бу иш актёрга енгилроқ жазо тайинлаш мақсадида қилинган. Ҳозирча навбатдаги қарорни кутар эканмиз, қуйида қонун билан боғлиқ муаммоларга дуч келган бошқа турк юлдузлари ҳақида маълумот берамиз.
Севил Акдаг
“Тақиқланган мева” сериалида иштирок этган Севил Акдаг қотиллик иши бўйича тергов қилинмоқда. 2025 йил апрель ойида актриса дугонаси Элиф Кирава билан жанжаллашиб, ғазаб устида унга тахминан 30 маротаба пичоқ урган. Воқеадан сўнг Севил Акдаг ўз жонига қасд қилмоқчи бўлган, аммо бунга улгурмай, ҳибсга олинган. Сўроқ пайтида у жиноятни маст ҳолатда содир этганини ва тафсилотларни эслай олмаслигини айтган. Эндиликда унга узоқ муддатли қамоқ жазоси таҳдид солмоқда.
Фейза Живелек
“Қизил шарбат” сериалидаги Нилай роли билан танилган Фейза Живелек 2024 йилда наркотик моддалар билан шуғулланувчи шахс билан учрашув вақтида полиция томонидан қўлга олинган. Маълум бўлишича, актриса буюртмани олиш учун келган, аммо товар ўша вақт унинг қўлида аниқланмагани сабабли озод қилинган.
Аднан Коч
“Муҳташам юз йил” сериалида Баҳром пошо образини яратган Аднан Коч 2018 йилда тақиқланган моддаларни сақлаш ва тарқатишда гумонланиб ҳибсга олинган. Актёр полицияга қаршилик кўрсатган ва бу ҳолат ишни янада мураккаблаштирган. Натижада у 16 йил 8 ой муддатга озодликдан маҳрум этилган.
Киванч Татлитуг
“Тақиқланган севги” сериали юлдузи Киванч Татлитуг 2014 йилда жиноят иши бўйича тергов қилинган. У икки йил давомида даромадларини яширганликда айбланган. Дастлаб унга 10 йил қамоқ жазоси таҳдид солган эди. Бироқ актёрнинг адвокати ўз мижозининг айбдор эмаслигини, асл айбдор эса бухгалтер эканлигини исботлаган ва актёрнинг номини оқлаб берган.
Чағатой Улусой
“Ёввойи асал” фильмидаги роли билан танилган Чағатой Улусой 2013 йилда гиёҳванд моддаларни сотишда гумонланиб ҳибсга олинган. Актёр маҳсулот тарқатиш билан боғлиқ айбловни рад этган, бироқ ўзи истеъмол қилганини тан олган. Суд уни тўрт йилга озодликдан маҳрум қилган, аммо ҳукм қайта кўриб чиқилгач, жазоси 10 ой муддатга қисқартирилган.
Изоҳ (0)