ҲАМАС гуруҳи Ғазога ўт очишни тўхтатиш бўйича АҚШ таклифига рози бўлди. Бу ҳақда Al Jazeera манбалари хабар берди. Бироқ америкалик расмийлар мазкур маълумотни рад этмоқда. Бу ҳақда Al Jazeera хабар берди.
АҚШ томони муҳокама қилинаётган келишувни “қабул қилиб бўлмайдиган” ва “ҳафсалани пир қиладиган” деб атади. Исроил расмийлари ҳам таклиф АҚШдан чиққанини рад этди ва ҳукумат буни қабул қилмаслигини билдирди.
Қарама-қарши маълумотлар Ғазода очарчиликни бошдан кечираётган аҳоли ҳужумга учраётгани, секторга гуманитар ёрдам кириши блоклангани фонида эълон қилинди. Биргина 26 май куни Исроил ҳужумлари оқибатида камида 81 киши, жумладан, кўплаб болалар ҳалок бўлди.
Манбаларга кўра, оташкесим бўйича келишув лойиҳасига ҲАМАС ва АҚШнинг Яқин Шарқдаги элчиси Стив Виткофф рози бўлган. Улар Доҳада учрашув ўтказган. Лойиҳа 60 кунлик ўт очишни тўхтатиш ва Ғазода сақланаётган 10 нафар тирик асирни икки босқичда озод қилишни назарда тутган.
АҚШ президенти Дональд Трамп келишув шартлари ва Исроил қўшинларининг Ғазодан олиб чиқилишини кафолатлаши керак эди. Келишув ҳар қандай шартларсиз инсонпарварлик ёрдамини киритишга имкон беришини кўзда тутган.
Бироқ Виткофф унинг таклифини ҲАМАС қабул қилгани ҳақидаги хабарларни рад этиб, буни “мутлақо қабул қилиб бўлмаслигини” айтган.
Исроилда бош вазир Биньямин Нетаньяху эса Ғазода қолган 58 нафар исроиллик асирни қайтаришга ваъда берган. Улардан 20 га яқини тирик экани тахмин қилинмоқда.
“Бугун бўлмаса, эртага, эртага бўлмаса, индинга бунга эришамиз. Биз таслим бўлмаймиз. Уларнинг барчасини, тирикларини ҳам, ўликларини ҳам қайтариб олиб келиш ниятидамиз”, деди Нетаньяху.
Ўз навбатида, ҲАМАС доимий ўт очишни тўхтатиш эвазига қолган асирларни бирданига озод қилишга тайёрлигини айтган.
У 53 миллиард долларлик режа доирасида Ғазо устидан назоратни вақтинчалик ҳукуматга топширишга тайёрлигини билдирган. Бироқ гуруҳ фаластинликларнинг кўчирилишига қарши чиқиб, қуролни топшириш ва раҳбарларини Ғазодан чиқаришни рад этган.
Исроил урушни қайта бошлаганидан бери фаластинликлар ўз уйларида, мактабларда, чодирларда, шунингдек, хавфсиз гуманитар зоналар деб аталадиган жойларда ҳужумга учраб келмоқда.
Исроилнинг қайта ҳужуми натижасида Ғазода камида 3 822 фаластинлик ҳалок бўлган. Ҳозирда тасдиқланган умумий қурбонлар сони 53 977 нафарга етганини айтилмоқда. 122 966 га яқин киши яраланган.
Изоҳ (0)