Президент Шавкат Мирзиёев Германия Федерал канцлери Фридрих Мерцни ушбу лавозимга сайлангани муносабати билан табриклади ва энг эзгу тилакларини билдирди. Бу ҳақда Президент матбуот котиби хабар берди.
Маълум қилинишича, давлат раҳбари ўз мактубида канцлер раҳбарлигидаги ҳукуматнинг бошқаруви остида Германия жаҳоннинг етакчи демократик ва иқтисодий ривожланган мамлакати сифатида ўз мавқейини янада мустаҳкамлашда давом этишига ишонч билдирган.
Ўзбекистон Европа Иттифоқидаги анъанавий ва вақт синовларидан ўтган ҳамда муҳим ҳамкор бўлган Германия билан кўп қиррали ҳамда узоқ муддатли алоқаларни чуқурлаштиришга устувор аҳамият қаратиши таъкидланган.
“Сиз билан биргаликдаги қатъий саъй-ҳаракатларимиз билан “яшил” иқтисодиёт, инвестициялар, инфратузилма, технологиялар, таълим, соғлиқни сақлаш, экология ва бошқа устувор соҳалардаги шериклигимиз жадал ривожланиб, келгусида мутлақо янги босқичга кўтарилишига аминман”, дейилади президент мактубида.
Маълумот учун Бундестаг иккинчи уринишда кўпчилик овоз билан христиан демократлар етакчиси Фридрих Мерцни Германия канцлери этиб сайлади. Унга ғалаба қозониш учун зарур бўлган 316 та мутлақ кўпчилик овоздан 325 нафар депутат овоз берди. Унинг тайинланишига 289 нафар парламент аъзоси қарши чиқди.
Изоҳ (0)