Афғонистон адлия вазири Абдул Ҳаким Шарий россиялик амалдорларга қамоқхоналарни қандай қилиб тўғри қуриш ва инсон ҳуқуқларини ҳимоя қилиш ҳақида гапирди. “Толибон” расмийси Санкт Петербург халқаро юридик форумида нутқ сўзлади.
Форумда Россиянинг юқори мартабали амалдорлари, хусусан, адлия вазири Константин Чуйченко ва унинг ўринбосари Олег Свириденко ҳам иштирок этган. Шарий ўз нутқида Афғонистонда шариат меъёрлари, шунингдек, “афғон халқининг диний, тарихий ва маданий қадриятлари”га асосланган “соф исломий адолат тизими” яратилганини айтган. У бундай модел ҳар бир инсоннинг ҳуқуқларини тўлиқ ҳимоя қилишини таъкидлаган.
Ислом шариатига мувофиқ амалга ошириладиган одил судлов ва назорат ҳақиқатнинг тантана қилишини, коррупциянинг илдизидан йўқ қилинишини ҳамда унга муҳтож бўлган ҳар бир кишининг қонуний ҳуқуқлари кафолатланишини таъминлайди, дея унинг сўзларини келтиради “Фонтанка” нашри.
Шунингдек, Шарий афғон қамоқхоналари “ахлоқий, диний ва ижтимоий реабилитация” амалга ошириладиган “тузатиш марказлари” эканини ҳам айтди.
У бундай қамоқхоналар маҳкумларда масъулият ҳиссини уйғотишини таъкидлади. Вазир Ислом тамойиллари Афғонистонда “муқаддас” саналиб, “энг олий қадрият”га эга эканини билдирди. У Афғонистон нафақат исломий қадриятларни, шунингдек, “Ислом амирлиги суверенитети, ҳудудий яхлитлиги ва қадр-қимматини” ҳурмат қиладиган давлатлар билан ҳамкорлик қилишга тайёрлигини билдирди.
Изоҳ (0)