Марказий Осиё давлатларида ҳар йили Ғалаба кунида уруш қатнашчиларига бир марталик махсус пул мукофотлари берилади. Бу йил Иккинчи жаҳон уруши қатнашчилари Қозоғистонда энг кўп, Туркманистонда эса энг кам миқдорда пул мукофоти олади.
Қозоғистонда
Қозоғистонлик уруш фахрийлари бошқа давлатларга нисбатан энг кўп пул мукофоти олади. Мамлакатда 148 нафар Иккинчи жаҳон уруши қатнашчиси истиқомат қилади. Уларнинг барчасига 9 майга қадар маҳаллий бюджетдан бир марталик нақд пул тўлови берилган. Ўртача ёрдам миқдори 1,7 миллион тенгени (7 май курси бўйича салкам 49 миллион сўм) ташкил қилади.
Ўзбекистонда
Мамлакатда Иккинчи жаҳон уруши қатнашчилари ва ногиронларининг ҳар бирига 20 миллион сўмдан берилади. Сарф-харажатлар республика бюджети маблағлари ҳисобидан амалга оширилади. 2023 йилда Иккинчи жаҳон уруши қатнашчилари ва ногиронларининг ҳар бирига 18 миллион сўм миқдорида бир марталик пул мукофоти берилганди.
Қирғизистонда
Мамлакатда бугунги кунда 41 нафар уруш қатнашчиси бор. Уларнинг ҳар бирига 9 майга қадар президент жамғармасидан 100 минг сомдан (14 миллион сўмдан зиёд) берилади.
Тожикистонда
Душанбеда яшовчи Иккинчи жаҳон уруши қатнашчилари ва ногиронларининг ҳар бирига 10 минг сомонийдан (7 майдаги курс бўйича тахминан 11,6 миллион сўмдан) пул ажратилади. Сўғд вилоятида эса уруш қатнашчиларининг ҳар бирига қарийб 7 минг сомоний (8 миллион сўмдан зиёд) миқдорида пул мукофоти берилади. Бу йил уруш қаҳрамонларига ёрдам бериш учун Сўғд вилояти ҳокимлиги томонидан жами 306 минг сомоний (355 миллион сўм) ажратилган. Тожикистонда 24 нафар Иккинчи жаҳон уруши қатнашчиси қолган.
Туркманистонда
Республика президенти Сердар Бердимуҳамедов Иккинчи жаҳон урушида фашизм устидан қозонилган ғалаба муносабати билан фахрийларга қимматбаҳо совғалар тақдим этиш тўғрисидаги фармонни имзолаган. Ҳужжатда фахрийларга 200 манат миқдорида (салкам 1,5 миллион сўм) пул ва совғалар берилиши белгилаб қўйилган.
Ўтган йилларда Ғалаба кунида фахрийларга ҳам худди шунча миқдорда пул берилган. Туркманистонда қанча Иккинчи жаҳон уруши қатнашчиси борлиги номаълум. 2018 йилдан бери Туркманистонда 9 май дам олиш куни ҳисобланмайди.
МДҲнинг бошқа давлатларида пул мукофотлари қанча?
Беларусда бу йил Ғалаба куни учун пул мукофоти 4 минг Беларусь рублини (15 миллион сўмдан ортиқ) ташкил қилади. Озарбайжонда фахрийлар тахминан 1 минг 200 доллар (15 миллион сўм) олади. Россиядаги фахрийларга 10 минг рубль (тахминан 1,3 миллион сўм) миқдорида ягона федерал тўлов берилади. Москвадаги уруш қатнашчилари қўшимча 25 минг рубль (салкам 3,5 миллион сўм) олади.
Изоҳ (0)