Markaziy Osiyo davlatlarida har yili G‘alaba kunida urush qatnashchilariga bir martalik maxsus pul mukofotlari beriladi. Bu yil Ikkinchi jahon urushi qatnashchilari Qozog‘istonda eng ko‘p, Turkmanistonda esa eng kam miqdorda pul mukofoti oladi.
Qozog‘istonda
Qozog‘istonlik urush faxriylari boshqa davlatlarga nisbatan eng ko‘p pul mukofoti oladi. Mamlakatda 148 nafar Ikkinchi jahon urushi qatnashchisi istiqomat qiladi. Ularning barchasiga 9-mayga qadar mahalliy byudjetdan bir martalik naqd pul to‘lovi berilgan. O‘rtacha yordam miqdori 1,7 million tengeni (7-may kursi bo‘yicha salkam 49 million so‘m) tashkil qiladi.
O‘zbekistonda
Mamlakatda Ikkinchi jahon urushi qatnashchilari va nogironlarining har biriga 20 million so‘mdan beriladi. Sarf-xarajatlar respublika byudjeti mablag‘lari hisobidan amalga oshiriladi. 2023-yilda Ikkinchi jahon urushi qatnashchilari va nogironlarining har biriga 18 million so‘m miqdorida bir martalik pul mukofoti berilgandi.
Qirg‘izistonda
Mamlakatda bugungi kunda 41 nafar urush qatnashchisi bor. Ularning har biriga 9-mayga qadar prezident jamg‘armasidan 100 ming somdan (14 million so‘mdan ziyod) beriladi.
Tojikistonda
Dushanbeda yashovchi Ikkinchi jahon urushi qatnashchilari va nogironlarining har biriga 10 ming somoniydan (7-maydagi kurs bo‘yicha taxminan 11,6 million so‘mdan) pul ajratiladi. So‘g‘d viloyatida esa urush qatnashchilarining har biriga qariyb 7 ming somoniy (8 million so‘mdan ziyod) miqdorida pul mukofoti beriladi. Bu yil urush qahramonlariga yordam berish uchun So‘g‘d viloyati hokimligi tomonidan jami 306 ming somoniy (355 million so‘m) ajratilgan. Tojikistonda 24 nafar Ikkinchi jahon urushi qatnashchisi qolgan.
Turkmanistonda
Respublika prezidenti Serdar Berdimuhamedov Ikkinchi jahon urushida fashizm ustidan qozonilgan g‘alaba munosabati bilan faxriylarga qimmatbaho sovg‘alar taqdim etish to‘g‘risidagi farmonni imzolagan. Hujjatda faxriylarga 200 manat miqdorida (salkam 1,5 million so‘m) pul va sovg‘alar berilishi belgilab qo‘yilgan.
O‘tgan yillarda G‘alaba kunida faxriylarga ham xuddi shuncha miqdorda pul berilgan. Turkmanistonda qancha Ikkinchi jahon urushi qatnashchisi borligi noma’lum. 2018-yildan beri Turkmanistonda 9-may dam olish kuni hisoblanmaydi.
MDHning boshqa davlatlarida pul mukofotlari qancha?
Belarusda bu yil G‘alaba kuni uchun pul mukofoti 4 ming Belarus rublini (15 million so‘mdan ortiq) tashkil qiladi. Ozarbayjonda faxriylar taxminan 1 ming 200 dollar (15 million so‘m) oladi. Rossiyadagi faxriylarga 10 ming rubl (taxminan 1,3 million so‘m) miqdorida yagona federal to‘lov beriladi. Moskvadagi urush qatnashchilari qo‘shimcha 25 ming rubl (salkam 3,5 million so‘m) oladi.
Izoh (0)