Шавкат Мирзиёев Эрон шимолида юз берган фожиа оқибатида Эрон президенти Иброҳим Раисий ва унга ҳамроҳлик қилган шахслар вафот этгани муносабати билан ушбу мамлакат олий диний раҳбари Оятуллоҳ Хоманаийга ҳамдардлик билдирди.
Президент матбуот котибининг хабар қилишича, мактубда Ўзбекистон ва Эрон ўртасидаги кенг қамровли ҳамкорликни, ўзаро манфаатли ва узоқ муддатли шериклик муносабатларини ривожлантиришга улкан ҳисса қўшган Иброҳим Раисийнинг ёрқин хотираси халқларимиз қалбида доимий сақланиб қолиши таъкидланади.
Давлат раҳбари дўст Эрон халқига, марҳумларнинг оила аъзолари ва яқинларига чуқур таъзия изҳор этди.
19 май куни Эрон президенти Иброҳим Раисий бўлган вертолёт Эрон-Озарбайжон чегараси яқинидаги Верзеган шаҳри яқинидаги тоғли ҳудудда ҳалокатга учради. Бортда президентдан ташқари Эрон ташқи ишлар вазири Амир Абдуллаҳён ва Шарқий Озарбайжон губернатори Оятуллоҳ ал-Ҳошим бўлган. 20 май куни қутқарувчилар вертолёт ҳалокатга учраган жойни аниқлади. Эрон расмийси Reuters агентлигига вертолёт қаттиқ қўниш чоғида бутунлай ёниб кетганини маълум қилди.
Эроннинг 63 ёшли президенти Иброҳим Раисий ушбу давлатга 2021 йилдан буён раҳбарлик қилаётганди. У Ўзбекистонга сўнгги марта 2023 йил 9 ноябрь куни рафиқаси Жамиле Аламолхода ҳамроҳлигида келганди. Шу куни Шавкат Мирзиёевнинг Эрон президенти Иброҳим Раисий билан учрашуви бўлиб ўтган. Унда Ўзбекистон—Эрон муносабатларини янада мустаҳкамлаш, савдо, инвестициялар, инновациялар ва транспорт соҳаларида амалий ҳамкорликни кенгайтириш масалалари муҳокама қилинган. Ўзаро мулоқотлар фаол давом этаётгани мамнуният билан қайд этилганди.
Изоҳ (0)