Американинг НАСА космик агентлиги 2024 YR4 астероидининг 2032 йил декабрь ойида Ой билан тўқнашиши бўйича прогнозини янгилади.
НАСАнинг Ерга яқин объектларни ўрганиш маркази экспертлари Webb маълумотлари ва ердаги телескоплардан олинган кузатувларни таҳлил қилди. Натижада астероиднинг Ой билан тўқнашиш эҳтимоли февраль ойи охиридаги 1,7 фоиздан 3,8 фоизга ошди. Астероиднинг Ернинг табиий йўлдоши билан тўқнашмаслик эҳтимоли ҳали ҳам 96,2 фоизни ташкил қилади.
Агар кўрсаткич кам бўлса, бу Ой орбитасини ўзгартирмайди, дея тушунтирди мутахассислар.
НАСА астероиднинг ўлчами ҳақидаги маълумотларни янгилади. У 174-220 фут (53-67 метр)га етади ва бу “тахминан, 10 қаватли бинонинг ўлчамига тенг”.
Мутахассислар прогнозига кўра, апрель ойидан сўнг астероид ердаги телескопларда кузатиш учун жуда узоқ ва хира бўлади. Бироқ Webb осмон жисмини 2025 йил май ойида ҳам кузатишни режалаштирмоқда.
2024 йил 27 декабрь куни НАСА мутахассислари Чилидаги АТLAS телескопи ёрдамида 54 метрлик 2024 YR4 астероидини кашф этди. Бир ой ўтиб, 2025 йил 27 январда, унга Турин шкаласи бўйича уч балл берилди.
Астрономия тарихида 2004 йилда Апофис астероиди бундан юқорироқ баҳо олган бўлиб, унга 4 балл берилган эди. Аммо кейинчалик бу астероиднинг Ерга хавф туғдирмаслиги аниқлангач, рейтинг пасайтирилган. Астрономлар фикрича, 2024 YR4 ҳам шунга ўхшаш сценарийни такрорлаши мумкин.
Январь ойи охирида астроном, Qadar обсерваторияси илмий раҳбари Стас Короткий унинг Ер билан тўқнашиш эҳтимоли 0,5 фоиздан 6 фоизгача бўлишини тахмин қилган эди. Бироқ НАСАнинг сўнгги маълумотлари бу сценарийни деярли истисно қилди.
Изоҳ (0)