Ер яқинидан 2 та жисмли астероид учиб ўтди

NASA мутахассислари Ер яқинидан 2 та астероид учиб ўтганини аниқлади. YЕ5 астероиди 2 объектли система экани маълум қилинди, деб ёзмоқда «Наука».

YЕ5 дастлаб 2017 йил 21 декабрда аниқланган. 2018 йилнинг июнида астероид Ерга энг яқин масофада яқинлашган. Ўшанда Ер ва астероид ўртасидаги масофа 6 миллион километрни ташкил қилган. Бу Ер ва Ой ўртасидаги масофадан 16 баробар кўпроқдир. Тадқиқотлар астероиднинг бир-бири атрофида айланувчи 2 объектдан иборат тизим бўлганини тасдиқлаган.

NASA астероиднинг яқиндан олинган суратларини эълон қилган. Суратларда бир-бирининг атрофида айланувчи 2 космик жисм акс этган. Дастлаб олимлар бу жисмларни 2 та мустақил астероид эмас, яхлит 1 та объект, деган янглиш хулосага келган эди.

NASA маълумотларига қараганда, астероид бир қатор ўзига хос хусусиятларга эга. Аввало, бошқа астероидлардан фарқли равишда, YЕ5 тим қора рангга эга. Мутахассисларнинг фикрича, астероид яна 170 йил давомида Ерга яқинлашмайди. YЕ5 мисолида олимлар 2 объектли космик жисмларни батафсилроқ ўрганиш имконига эга бўлади.