Amerikaning NASA kosmik agentligi 2024 YR4 asteroidining 2032-yil dekabr oyida Oy bilan to‘qnashishi bo‘yicha prognozini yangiladi.
NASAning Yerga yaqin obyektlarni o‘rganish markazi ekspertlari Webb ma’lumotlari va yerdagi teleskoplardan olingan kuzatuvlarni tahlil qildi. Natijada asteroidning Oy bilan to‘qnashish ehtimoli fevral oyi oxiridagi 1,7 foizdan 3,8 foizga oshdi. Asteroidning Yerning tabiiy yo‘ldoshi bilan to‘qnashmaslik ehtimoli hali ham 96,2 foizni tashkil qiladi.
Agar ko‘rsatkich kam bo‘lsa, bu Oy orbitasini o‘zgartirmaydi, deya tushuntirdi mutaxassislar.
NASA asteroidning o‘lchami haqidagi ma’lumotlarni yangiladi. U 174-220 fut (53-67 metr)ga yetadi va bu “taxminan, 10 qavatli binoning o‘lchamiga teng”.
Mutaxassislar prognoziga ko‘ra, aprel oyidan so‘ng asteroid yerdagi teleskoplarda kuzatish uchun juda uzoq va xira bo‘ladi. Biroq Webb osmon jismini 2025-yil may oyida ham kuzatishni rejalashtirmoqda.
2024-yil 27-dekabr kuni NASA mutaxassislari Chilidagi ATLAS teleskopi yordamida 54 metrlik 2024 YR4 asteroidini kashf etdi. Bir oy o‘tib, 2025-yil 27-yanvarda, unga Turin shkalasi bo‘yicha uch ball berildi.
Astronomiya tarixida 2004-yilda Apofis asteroidi bundan yuqoriroq baho olgan bo‘lib, unga 4 ball berilgan edi. Ammo keyinchalik bu asteroidning Yerga xavf tug‘dirmasligi aniqlangach, reyting pasaytirilgan. Astronomlar fikricha, 2024 YR4 ham shunga o‘xshash ssenariyni takrorlashi mumkin.
Yanvar oyi oxirida astronom, Qadar observatoriyasi ilmiy rahbari Stas Korotkiy uning Yer bilan to‘qnashish ehtimoli 0,5 foizdan 6 foizgacha bo‘lishini taxmin qilgan edi. Biroq NASAning so‘nggi ma’lumotlari bu ssenariyni deyarli istisno qildi.
Izoh (0)