Францияда президент Эммануэл Макроннинг рафиқаси Брижит “аслида эркак бўлиб туғилган” деган даъвоси учун судланган журналист Наташа Рей оқланди. Бу ҳақда Le Меdia хабар берди.
Париж апелляция судининг тегишли қарори ҳақида журналистнинг адвокати Франсуа Данглеан маълумот берди.
Брижит ва Жан-Мишел Троне (президент рафиқасининг қизлик фамилияси) устидан ғалаба: апелляция суди Наташа Рейни оқлади, у энди Брижит ва Жан-Мишел Тронега қарши суд жараёнидаги фирибгарлик учун хусусий айблов қўйишни режалаштирмоқда, деб ёзди адвокат Х ижтимоий тармоғида.
Воқеа 2021 йил декабрь ойида ўзини мустақил журналист деб таништирган Наташа Рей YouTube’га видео жойлаганида бошланган. Видеода у Брижит аслида Жан-Мишел исмли эркак эканини таъкидлаган. Видео қисқа вақт ичида вирус каби тарқалиб, Франция ичида ҳам, хориждаги оммавий ахборот воситаларида ҳам кенг ёритилган.
2024 йил март ойида президент Эммануэл Макрон ушбу миш-мишларга биринчи марта муносабат билдириб, президентлик фаолиятидаги энг оғир нарсалардан бири — одамлар ишонадиган “сохта маълумот ва тўқима сюжетлар” эканини айтган. Улар шахсий ҳаётга ҳам аралаша бошлайди, деган эди Макрон.
2024 йил сентябрь ойида Париж суди туҳмат учун икки аёлга, шу жумладан Рейга 13,5 минг евро жарима солган. Кейинчалик юқори суд инстанцияси бу қарорни тасдиқлаган эди.
Макроннинг рафиқаси “аслида эркак” экани даъво қилинган бошқа ҳолатлар ҳам бўлган. Жумладан, америкалик журналист Кендис Оуэнс Брижитнинг эркак жинсида туғилгани ҳақидаги далилларни эълон қилишга ваъда берганди.
Журналистнинг таъкидлашича, Макрон ўзининг ўқитувчиси 39 ёшли Брижит билан муносабатга киришганида 15 ёшда бўлган, аммо ўқитувчининг мактаб ёки талабалик ҳаётидан ҳеч қандай маълумот мавжуд эмас.
Оуэнс, шунингдек, 2024 йилнинг ноябрь ойида француз журналисти Наташа Рей билан суҳбат ўтказганини маълум қилди, у Брижит Макрон эркак бўлиб туғилганини ва бунинг учун судланганини айтганди.
Изоҳ (0)