Венесуэла ҳукумати мамлакатда Х ижтимоий тармоғи фаолиятини тўхтатишга қарор қилганидан сўнг америкалик тадбиркор ва ишбилармон Илон Маск президент Николас Мадуронинг “мўйловини қисқартириш” учун “космик лазер”дан фойдаланишини айтди.
Тармоқ фойдаланувчилари тадбиркордан Венесуэла расмийларининг мамлакатдаги Х ижтимоий тармоғини ёпиш ҳақидаги қарорига жавоб бериш учун “космик лазерлар” тайёрлаяптими ёки йўқлигини сўрашган.
“Биз унинг мўйловини космосдан туриб ёқиб юборамиз”, дейди Маск.
Аввалроқ Мадуро Х ижтимоий тармоғи мамлакатда кўп маротаба қонунбузарлик содир этгани ва шу сабабли унинг Венесуэладаги фаолияти 10 кунга тўхтатилишини маълум қилган эди.
Венесуэла президентининг таъкидлашича, ижтимоий тармоқ нафрат, фашизм, фуқаролар уруши, венесуэлаликлар ўртасида қарама-қаршиликлар қўзғатади. Унинг қўшимча қилишича, у ижтимоий тармоқни Венесуэладаги фаолиятини 10 кунга ўчиришга қарор қилган Миллий телекоммуникация комиссияси таклифига имзо чеккан.
Шунингдек, Венесуэла президенти Илон Маскни жангга чорлагани ҳақида хабар берилган эди. Тадбиркор чақирувни қабул қилган ва бир шарт қўйган: агар у ғалаба қозонса, Мадуро ўз лавозимини тарк этади, агар президент ғалаба қозонса, унга Марсга бепул парвоз ташкиллаштириб берилади.
Изоҳ (0)