Нью Йоркда фуқароларга маошларини биткоинларда олиш ва коммунал хизматлар учун тўловларни биткоинлар орқали амалга ошириш имконияти яратилиши мумкин. Бу ҳақда Лас Вегасда ўтказилаётган Bitcoin 2025 конференцияси доирасида Нью Йорк шаҳри мери Эрик Адамс маълум қилди, дея хабар бермоқда “РИА Новости”.
“Шаҳарда амалга оширишимиз мумкин бўлган баъзи ишлар бор. Бизга ҳеч қандай федерал тартибга солиш керак эмас. Биз одамларга коммунал тўловларни биткоинлар орқали тўлашга рухсат беришимиз мумкин. Одамларга маошларини биткоинларда олишларига имкон яратишимиз мумкин... Ҳозироқ қилишимиз мумкин бўлган ишлар бор ва биз уларни амалга оширишни бошлаймиз”, деди у агентлик мухбири билан суҳбатда.
Адамснинг қўшимча қилишича, мегаполис маъмурияти ўз даражасида биткоиндан фойдаланишнинг мумкин бўлган йўлларини баҳолайди, кейин эса штат маъмурияти ва федерал ҳукумат билан ҳамкорликни йўлга қўяди.
“Федерал даражада яхши ҳамкоримиз бор. Энди штатни жалб қилишимиз керак”, деди мер.
Эрик Адамснинг қўшимча қилишича, шаҳар ҳокимияти мактабларда болаларни криптовалюталардан фойдаланишга ўргатишни бошлайди, чунки буни жуда муҳим деб ҳисоблайди.
“Буни мактабларимизда жорий этмоқчимиз”, деди Нью Йорк мери криптовалюталардан фойдаланиш бўйича аҳолининг билимини ошириш зарурлигини изоҳлаётиб.
Адамснинг фикрича, у ҳокимият фаолиятининг ушбу йўналишини “жуда муҳим” деб баҳолайди.
Изоҳ (0)