Эҳтиёжманд оилалардаги хотин-қизларга 2025/26-ўқув йили учун ОТМларга киришга тавсиянома олиш учун аризалар қабули бошланди. Бу ҳақда Оила ва хотин-қизлар қўмитаси ахборот хизмати раҳбари Саодат Боймирзаева хабар берди.
Тавсиянома олиш учун талабгорлар Оила ва хотин-қизлар қўмитасининг ахборот тизими — tavsiyanoma.ijro.uz орқали 30 майдан 8 июнгача онлайн ариза қолдириши лозим.
Тавсиянома 6 та мезон асосида берилади:
- кам таъминланган оилалардаги хотин-қизлар;
- тўлиқсиз оилада тарбияланаётган ижтимоий ҳимояга муҳтож қизлар;
- турмуш ўртоғи вафот этган, фарзандини ёлғиз тарбиялаётган аёллар;
- ногиронлиги бўлган фарзанди бор аёллар;
- икки ва ундан ортиқ фарзандларини ижарада ёки алоҳида тарбиялаётган ёлғиз аёлларнинг қизлари;
- ота-онасидан бири ёки ҳар иккаласи биринчи/иккинчи гуруҳ ногирони бўлган хотин-қизлар.
Тавсиянома эгаси абитуриент сифатида рўйхатдан ўтишда фақат танлаган биринчи таълим йўналиши бўйича қўшимча 4 фоизли давлат гранти асосида танловда иштирок этади. Кириш имтиҳонида энг юқори баллнинг камида 30 фоизини тўплаган тавсияномага эга бўлганлар баллар кетма-кетлигига риоя этилган ҳолда талабаликка тавсия этилади.
Ушбу тавсиянома эҳтиёжманд оилалардаги хотин-қизларга бир йил муддатга берилади. 2024 йилда 36 853 нафар талабгор хотин-қиздан тавсиянома олиш учун аризалар онлайн қабул қилинган.
Мутахассислиги бўйича камида 5 йил иш стажига бор, олий маълумотга эга бўлмаган хотин-қизлар давлат ОТМларига алоҳида қабул квоталари асосида ўқиш имкониятига эга. Талабгор хотин-қизларга тавсиянома учун 31 май (шу куни ҳам) кунига қадар ўзлари яшаб турган ҳудуддаги туман (шаҳар) оила ва хотин-қизлар бўлимларига мурожаат қилишлари керак.
Ўзбекистонда хотин-қизларнинг олий таълимдаги қамрови
Сўнгги йилларда мамлакатда аёлларнинг олий таълимдаги қамрови қарийб 53 фоизга, магистратурада 62,7 фоизга етди, фоизсиз таълим кредитлари, эҳтиёжманд қизларга грантларнинг ажратилиши, хотин-қизларнинг магистратурадаги таълими учун маблағлар давлат томонидан қоплаб берилиши каби жуда катта имтиёзлар бевосита олий таълимдаги хотин-қизлар улушининг ортиб боришига хизмат қилмоқда.
Охирги 2 йилнинг ўзида хотин-қизларнинг 400 мингга яқинига 4,3 триллион сўм таълим кредити ажратилган, Олий таълим бўйича 2017 йилга нисбатан бакалавриатда 39 фоиздан 52,2 фоизга кўтарилган (23 фоизга ошган), магистратурадаги талаба қизлар сони 2018 йилга нисбатан 3,8 баробарга ортган.
Изоҳ (0)