“Минг нафарга яқин чин етим талабалар давлат ҳисобидан ўқитилмоқда” — Комилжон Каримов

Ўзбекистонда минг нафарга яқин чин етим талабалар давлат гранти асосида ўқитилмоқда. Бу ҳақда олий таълим, фан ва инновациялар вазирининг биринчи ўринбосари Комилжон Каримов “Дарё” нашрига берган интервьюсида маълум қилди.

Вазирлик расмийсининг айтишича, ҳозирда ижтимоий ҳимояга муҳтож талабаларни қўллаб-қувватлашга эътибор ортган.

“Биринчи ўринда ногиронлиги бўлган, чин етим талабалар, кам таъминланган оила фарзандлари учун олий таълим олишга имконият яратилмоқда. Мисол учун, ногиронлиги бўлган талабалар учун умумий квотадан икки фоиз ўринлар ажратилмоқда. ОТМларга киришда уларга алоҳида танлов амалга ошириляпти. Чин етимлар ҳам давлат ҳисобидан ўқитиляпти. Бу йил минг нафарга яқин чин етим талабалар ўқишга қабул қилинди ва улар тўлиқ давлат ҳисобидан ўқитилмоқда.

Шу билан бирга, кам таъминланган хотин-қизлар учун ҳам икки мингта квота ажратилган. Шунингдек, беш йил стажга эга бўлган 500 нафар хотин-қизларга ҳам квоталар берилмоқда”, — деди вазир ўринбосари.

Комилжон Каримовнинг қўшимча қилишича, талабалар сони 2017 йилдан бери қарийб тўрт баравар кўпайди.

“2017 йилда республикада бор-йўғи 77 та ОТМ бўлган. Бугунги кунга келиб, расмий лицензияга эга бўлган ОТМлар сони 209 тага етди. Шундан 65 таси нодавлат, 30 таси хорижий ОТМлар филиаллари ҳисобланади. Ҳозирда жами талабалар сони бир миллион нафардан ошди. 2017 йилда бу сон 250 минг нафар бўлган. Бу тўрт баравар кўп ўсиш дегани”, — дея таъкидлади вазирлик расмийси.

Аввалроқ Комилжон Каримов “Дарё” нашрига берган интервьюсида олий таълим тизимида сўнги олти йилда кузатилган муҳим ўзгаришлар ҳақида гапирганди.