Ўзбекистондаги нодавлат олий таълим муассасаларинг рейтинги эълон қилинди

Ўзбекистонда бугунги кунда нодавлат ОТМлар сони 76 та бўлиб, уларда 1 миллиондан ортиқ талаба таҳсил олмоқда. Бу ҳақда нодавлат ОТМ рейтинги юзасидан ташкил этилган матбуот анжуманида маълум қилинди, дея хабар бермоқда “Дарё” мухбири.

Анжуманда таъкидланишича, соҳада баъзи муаммолар юзага келмоқда. Жумладан, охирги 5 йилда талабалар сони 3 баробарга ошса-да, лекин профессор-ўқитувчилар сони 1,6 баробарга ошган.

Бу ўз навбатида замонавий ва чуқурлаштирилган фанлар бўйича ўқитувчилар танқислиги, қабул жараёнида селексияга эътиборнинг сусайиши, олий таълим стандартларининг ишламаслиги каби бир қатор кутилмаган муаммоларни келтириб чиқармоқда.

Бу ўз навбатида битирувчиларнинг ўз йўналиши бўйича ишга жойлашишда қийинчиликка учраши, олий таълим сифати тушиши ва дипломга ишонч йўқолиши каби жиддий тўсиқлар пайдо қилади,  дейилди анжуманда.

Шуни инобатга олган ҳолда, “Ёш зиёкор” нодавлат таълим ташкилотлари уюшмаси томонидан олий таълим сифатини ошириш, ижобий рақобат муҳитини шакллантириш мақсадида нодавлат ОТМ рейтингини ишлаб чиқилган.

Рейтинг нимага асосланган?

Профессор-ўқитувчилар:

• бир ўқитувчига тўғри келадиган талабалар сони – гуруҳлардаги талабалар сони, ихтисосликлар бўйича ўқитувчиларнинг мавжудлиги;
• чет эллик педагоглар улуши – халқаро тажрибага эга мутахассисларнинг мавжудлиги ва талабаларни халқаро меҳнат бозорига тайёрлаш;

Селексия жараёни:

• кириш шартлари – бир ўринга тўғри келадиган абитуриентларнинг сони;
• чет эллик талабалар улуши – халқаро олий таълим бозорида тан олинганлик даражаси;

Ихтисослашиш:

• Сиртқи талабалар улуши – дарс соатларининг сони;
• Техник йўналишларда талабалар улуши – аниқ фанлар ва илмий-техник тараққиётга эътибор;

Инклюзивлик:

• Талабалар ичида қизлар улуши – хотин-қизлар учун шароитларнинг мослаштирилгани ҳисобига уларнинг танловига сазовор бўлиш;
• Вилоятлардан келиб ўқиётган талабалар улуши – узоқда истиқомат қилувчилар танлови.

Маълумотлар базаси

Рейтинг ишлаб чиқиш методологияларининг турли-туманлиги ҳар бир ҳолат учун маълумотлар базасини топа олиш имкониятларига турлича эканлигидан келиб чиқади. Жумладан, амалиётда рейтинг учун маълумотлар қуйидаги манбаларда тўпланган:

• Мамлакат даражасидаги маълумотлар базалари (Ўзбекистон шароитида HEMIS);
• Вазирликлар ва бошқа давлат идораларининг маълумотлар базалари;
• Сўровлар ва қўнғироқлар;
• ОТМ веб сайтлари ва бошқалар.

Натижалар:

1. Тошкент халқаро университети;
2. Самарқанд халқаро технология университети;
3. British Management University in Таshkent

Шу билан бирга Зармед университети, Урганч RANCH технология университети ҳамда Маъмун университети рейтингнинг энг қуйи поғоналаридан ўрин олган.