Англиянинг “Фулҳэм” клуби ҳамда Туркиянинг “Бешиктош” жамоаси Италия грандларидан бири — “Интер” ҳужумчиси Меҳди Таремига жиддий қизиқиш билдирмоқда. Бу ҳақда таниқли футбол инсайдери Экрем Конур ўзининг ижтимоий тармоқдаги саҳифасида хабар берди.
Манбага кўра, ҳар икки клуб аллақачон “Интер” билан 32 ёшли форварднинг трансфери борасида музокараларни бошлаган. “Нерадзуррилар” раҳбарияти ўтган мавсумдаги натижалардан қониқмагани сабаб, Таремига чиқиш эшикларини кўрсатмоқда.
2024/25 йилги мавсумда Меҳди Тареми А Серияда 26 учрашувда майдонга тушиб, атиги 1 гол ва 2 ассист қайд этди. Шунингдек, у Италия Кубогида 3 та ўйинда иштирок этиб, 1 та голли узатмага муаллифлик қилган. Чемпионлар Лигасида эса 12 та учрашувда ўз ҳисобига 1 гол ва 3 та ассист ёздириб қўйган.
Мазкур статистик кўрсаткичлар “Интер” раҳбарияти учун етарли бўлмади. Клуб футболчини сотиб, унинг ўрнига янги ҳужумчи харид қилишни режалаштирмоқда.
Маълумот учун, Меҳди Таремининг “Интер” билан амалдаги шартномаси 2027 йил ёзигача мўлжалланган. Transfermarkt портали футболчининг трансфер қийматини 3,5 миллион еврога баҳолаган.
Изоҳ (0)