Чет элда 90 кундан ортиқ бўлиб қайтган Ўзбекистон фуқароларини ҳамда меҳнат фаолиятини амалга ошириш учун мамлакатга келган хорижликларни мажбурий равишда ОИВга тиббий текширувдан ўтказиш кўзда тутилган қонун лойиҳаси депутатлар томонидан учинчи ўқишда қабул қилиниб, Сенатга юборилди.
Қонун лойиҳаси билан “Одамнинг иммунитет танқислиги вируси келтириб чиқарадиган касаллик (ОИВ инфекцияси) тарқалишига қарши курашиш тўғрисида”ги, “Аҳолининг санитария-эпидемиологик осойишталиги тўғрисида”ги, “Хусусий бандлик агентликлари тўғрисида”ги ҳамда “Аҳоли бандлиги тўғрисида”ги қонунларга бир қатор ўзгартириш ва қўшимчалар киритиш таклиф қилинмоқда.
Хусусан, узлуксиз 90 кун ва ундан ортиқ муддат давомида чет элда бўлиб қайтган 18 ёшдан 60 ёшгача бўлган Ўзбекистон фуқаролари, Ўзбекистон ҳудудида доимий яшайдиган чет эл фуқаролари ва фуқаролиги бўлмаган шахслар ҳамда меҳнат фаолиятини амалга ошириш учун республикага кириб келаётган чет эл фуқаролари ва фуқаролиги бўлмаган шахсларни мажбурий равишда ОИВга тиббий текширувдан ўтказиш белгиланмоқда.
Шунингдек, узлуксиз 90 ва ундан ортиқ муддат давомида чет элда бўлиб қайтган 18 ёшдан 60 ёшгача бўлган Ўзбекистон фуқаролари ва мамлакат ҳудудида доимий яшайдиган фуқаролиги бўлмаган шахслар давлат бюджети маблағлари ҳисобидан, меҳнат фаолиятини амалга ошириш учун Ўзбекистонга кириб келаётган чет эл фуқаролари ва фуқаролиги бўлмаган шахслар ҳамда Ўзбекистонда доимий яшайдиган чет эл фуқаролари эса – ўз маблағлари, иш берувчининг маблағлари ёки қонунчиликда тақиқланмаган бошқа маблағлар ҳисобидан тиббий текширувдан ўтказилиши назарда тутилмоқда.
Бундан ташқари, Ўзбекистондан ташқаридаги ишни қидираётган шахсларни бораётган давлатининг қонунчилиги, унда бўлиш қоидалари бўйича ўқитишни ташкил этиш ва зарур материаллар билан таъминлаш мажбуриятини хусусий бандлик агентликларининг лицензия шартларидан бири этиб белгилаш ҳам таклиф этилмоқда.
Нима учун 90 кун белгиланмоқда?
Ташаббускорлар депутат Шерзод Қулматов бунга изоҳ бериб, бу юқумли касаллик инсон организмида 90 кундан сўнг ўзини намоён қилишини қайд этганди. У шунингдек, чет элдан қайтган фуқаро агар ўзининг, оиласининг соғлиғини ўйласа, тезда тиббий кўрикдан ўтиши лозимлигини билдирганди.
Маълумотларга кўра, ўтган йили хорижда бўлиб қайтган 1,7 миллион фуқаронинг 434 минги, яъни 25 фоизи ихтиёрий ОИВ/ОИТС текширувидан ўтган ва уларнинг 1512 нафарида ушбу касаллик аниқланган. Қонунчиликда бу борада мажбурий тиббий кўрик бўлмагани учун аксарият фуқаролар текширувга келмаяпти.
Депутатларнинг таъкидлашича, қонун лойиҳасининг қабул қилиниши инсон саломатлиги учун хавф туғдирувчи юқумли касалликлар тарқалишининг олдини олишга, аҳоли саломатлигини муҳофаза қилишга, меҳнат миграцияси жараёнларида ижтимоий хавфсизликни таъминлаш бўйича таъсирчан ҳуқуқий механизмларни шакллантиришга хизмат қилади.
Изоҳ (0)