Энрике Иглесиас концерти чипталари 5 млн сўмдан сотилди. Бу пулга яна нималар қилиш мумкин?

Испаниялик қўшиқчи Энрике Иглесиас 28 декабрь куни «Истиқлол» саройида концерт берди. «Дарё» маълумотига кўра, концерт учун фаол ёшларга бепул тарқатилган чипталар олибсотарлар қўлида 5 миллион сўмгача сотилди (ижтимоий тармоқларда 7 миллионга баҳоланган чипталар ҳақида ҳам ёзилди). Энрике Иглесиас концертининг олди қаторидан битта чипта олишдан ташқари 5 миллион сўмга нималар қилса бўларди?

Бу пулга:

— Иглесиас сабаб бир куни 2018 йилга кўчирилган Обид Асомов концертининг энг арзон чипталаридан 333 та сотиб олиш мумкин;

— Таълим муассасалари раҳбарларини ножўя сўзлар билан ҳақорат қилган киши 5 миллион сўмга 167 200 сўм қўшиб, қилган иши учун жарима тўлаши мумкин;

— 2016 йил давлат бюджети параметрларида тез тиббий ёрдамнинг 10 352 та чақируви харажатини қоплаш мумкин эди, 2018 йилда эса 1000 та чақирув харажатларини қоплаш мумкин бўлади;

— Қарийб 1 тонна шакар ёки 1,5 тонна картошка сотиб олиш мумкин;

— 1315 литр Аи-80 бензин сотиб олиб, 37 та Matiz’нинг бензин бакини тўлдириш мумкин;

— Тошкент шаҳрида 4166 марта жамоат транспортлари — автобус, метролардан фойдаланиш мумкин;

— «Автобус-Метро» ойлик йўл чиптасидан 30 та олиш мумкин (агар нархлар ўзгармаса ва олдиндан келаси ойлар учун буюртма қилиш мумкин бўлса, Тошкентда жамоат транспортидан 2,5 йил давомида бепул фойдаланиш мумкин);

— «Ўзбекистон ҳаво йўллари» самолётида 4 марта Тошкентдан Душанбега бориб-келиш мумкин;

— Юридик, Дипломатия университетлари бакалавриатида ўқиётган талабанинг бир йиллик контракт пулининг ярмини бемалол тўлаш мумкин;

— Murad Buildings’нинг энг арзон квартирасидан 0,71 квадрат метр (бир квадрат метрдан ҳам камроқ) жой ёки Тошкентнинг Яккасарой туманида эса иккиламчи кўчмас мулк бозоридан уч хонали квартиранинг бир квадрат метрини сотиб олиш мумкин;

— 769 та 1,5 литрли Coca-Cola сотиб олиб, эни, бўйи, узунлиги 105 сантиметр бўлган бассейнни тўлдириш мумкин;

— Агар 346 сўми берилмаслигига рози бўлса, 2017 йил январь—сентябрь ойларида беш кишига ўртача ойлик иш ҳақи тўлаш мумкин эди;

— Ички хотираси 16 гигабайт бўлган Xiaomi Redmi 4Х смартфонидан бешта сотиб олиш мумкин;

— UzMobile GSM ва UMS’нинг 2 гигабайтли интернет-пакетидан 98 та, Ucell’нинг худди шундай интернет-пакетидан 79 та, «Билайн-Ўзбекистон»нинг 2 гигабайтли интернет-пакетидан эса 118 та сотиб олиш мумкин;

— SUVAN NET компаниясидан 294 та UZ домен номини сотиб олиш мумкин;

— Artel’нинг 32 дюймли оддий телевизоридан учта ёки Apetito 00-G газ плитасидан тўртта ёки General Mobile 5D смартфонидан бешта олиш мумкин.