Хитойлик парапланчи 8500 метр баландликдан сакраб омон қолди. Ҳодиса тасодифан бўлгани айтилмоқда. Бу ҳақда BBC хабар берди.
55 ёшли Пенг Южианг Хитойнинг шимоли-ғарбида янги ускунани синаб кўраётган эди. У Қилиан тоғлари устида, денгиз сатҳидан 3 минг метр баландликда парвоз қилаётганда булутлар оқими уни яна 5 минг метр баландга учириб кетган.
Воқеа 24 май куни содир бўлган ва парапланчининг глидерига ўрнатилган камерага муҳрланган. Видео Хитойнинг Douyin тармоғига жуда кенг тарқалиб кетган. Видеода Пенг глидер бошқарувини маҳкам ушлаб тургани, юзи ва танасининг кўп қисми муз бўлакчалари билан қоплангани кўринади.
“Бу жуда қўрқинчли бўлди... Ҳаммаёқ оқ рангга бурканган эди. Қайси томонга кетаётганимни кўра олмай қолдим. Компас бўлмаганда, қаерга кетаётганимни билмас эдим. Мен тўғри учяпман деб ўйладим, лекин аслида айланаётган эканман. Тезроқ пастга тушишга ҳаракат қилдим, лекин иложи бўлмади. Янада баландроққа кўтарилиб кетдим ва булут ичига кириб қолдим”, деди у.
Пенг Эверестдан ҳам камроқ кислород бўлган шароитда омон қолди. Ҳарорат бундай баландликда -40 даражагача бўлиши мумкин. Хитой ҳукумати ҳодиса устида тергов бошлаган. У парвозни рухсатсиз амалга оширгани сабабли фаолиятидан олти ойга четлатилган, деб хабар берилди.
Изоҳ (0)