Германия терма жамоаси ва Леверкузеннинг “Байер” клуби ҳужумкор ярим ҳимоячиси Флориан Вирц Англияга йўл олиши мумкин. Бу ҳақда Sky Sports нашри хабар берди.
Унга “Манчестер Сити” жиддий қизиқиш билдирмоқда. Клуб устози Пеп Гвардиола футболчини жамоага олиб келишни истамоқда ва уни келажакдаги режаларининг бир қисми сифатида кўрмоқда. Шу боис “шаҳарликлар” раҳбарияти ортга чекинишни истамаяпти. Маълумотларга кўра, клуб вакиллари аллақачон “Байер” билан музокаралар ўтказган ва томонлар ўртасида оғзаки келишувга эришилган.
Вирцнинг леверкузенликлар билан тузган амалдаги шартномаси 2027 йилгача мўлжалланган. Transfermarkt портали унинг қийматини 140 миллион еврога баҳоламоқда.
Флориан жорий мавсум Бундеслига доирасидаги 30 та ўйинда майдонга тушиб, ўз ҳисобига 10 та гол ва 12 та голли узатма ёздириб қўйган.
Аввалроқ ОАВда футболчининг оила аъзолари Вирцни Германиянинг бошқа жамоаси — “Бавария”га ўтиши тарафдори эканлиги борасида хабарлар тарқалган эди. Шунингдек, унга Мадриднинг “Реал” клубидан ҳам таклифлар борлиги айтилганди.
Изоҳ (0)