2026 йилги Жаҳон чемпионати саралаш доирасида Аргентина ва Колумбия терма жамоалари ўзаро тўқнаш келди. Баҳс 1:1 ҳисобидаги дуранг билан якунланган бўлса-да, майдонда футболчилар ўртасида кескин ҳолатлар ҳам юз берди.
Учрашув давомида Лионель Месси ва Хамес Родригес ўртасида оғзаки тортишув юзага келди. Аргентиналик журналистлар, хусусан, TyC Sports телерадиокомпанияси ушбу зиддиятдан айрим сўзларни аниқлай олишди.
Месси Хамесга шундай мурожаат қилган:
Сен финалда бизга ёрдам беришганини айтган эдинг. Жуда кўп гапиряпсан.
Хамес эса буни инкор қилган:
Мен ҳеч нарса демаганман.
Тўлиқ суҳбатни аниқлаш қийин бўлди, чунки тортишув давомида икки футболчи ҳам оғзини қўллари билан беркитган. Бироқ TyC Sports версиясига кўра, Мессининг эътирозлари Хамеснинг 2024 йилги Америка Кубоги финалидан кейинги баёнотларига қаратилган бўлиши мумкин.
Эслатиб ўтамиз, ўша финалда Колумбия Аргентина терма жамоасига мағлуб бўлган эди. Беллашувдан кейин Хамес ҳакамлик ва бошқа ташқи омилларни танқид қилиб, “натижага ташқи кучлар таъсир кўрсатди”, деган фикр билдирганди.
Изоҳ (0)