Иккинчи энг енгил вазн тоифасида WBA Interim камари соҳиби, ўзбекистонлик Муроджон Аҳмадалиев (14-1, 11 КО) ва супер енгил вазн тоифасининг мутлақ чемпиони, япониялик Наоя Иноуэ (30-0, 27 КО) ўртасидаги жанг расман тасдиқланди. Аҳмадалиев ўзининг Instagram саҳифасида хабар беришича, ушбу қизиқарли тўқнашув 14 сентябрь куни Япониянинг Токио шаҳрида бўлиб ўтади.
Аҳмадалиев ва Иноуэ ўртасидаги эҳтимолий жанг узоқ вақтдан бери муҳокама қилиниб келаётган эди. Муроджон бир нечта жанглардан сўнг ўтказилган матбуот анжуманларида Иноуэни жангга чорлаб келаётган, бироқ япониялик чемпион бунга розилик бермаётган эди. WBA ташкилоти эса агар Иноуэ яна жангдан бош тортса, ундан чемпионлик камарини олиб қўйиши мумкинлиги ҳақида огоҳлантирди.
Ниҳоят, Аҳмадалиевнинг промоутери Эдди Хирн ва менежери Вадим Корнилов Иноуэнинг промоутерлари билан келишувга эришиб, Токиода ўтказиладиган жанг бўйича шартнома имзолашди.
Маълумот ўрнида, Наоя Иноуэ 4 май куни Лас-Вегасда Рамон Карденасни мағлуб этган бўлса, Муроджон Аҳмадалиев 31 май куни Мексиканинг Гвадалахара шаҳрида Луис Кастилё устидан ғалаба қозонди.
Изоҳ (0)