Қозоғистон АҚШга импорт божлари масаласида Вашингтон билан музокараларга тайёр эканини билдирди. Бу ҳақда Қозоғистон Савдо ва интеграция вазирлигига баёнотида маълум қилинди.
АҚШ президенти Дональд Трампнинг қарорига кўра, АҚШ 1 августдан бошлаб Қозоғистондан келадиган товарлар учун 25 фоизлик импорт бож жорий этади.
Вазирликнинг таъкидлашича, янги таърифларга қарамасдан Қозоғистон маҳсулотларининг аксарияти янги чекловлар таъсирига тушмайди. Икки томонлама савдо учун стратегик аҳамиятга эга маҳсулотлар — нефть, уран, кумуш, ферроқотишмалар, тантал ва титан ўзгаришсиз экспорт қилинишда давом этади.
Дастлабки баҳоларга кўра, Қозоғистоннинг АҚШга экспортининг қарийб 95 фоизи Вашингтон чораларига таъсир қилмайди.
“Қозоғистон Республикаси ҳукумати қозоғистонлик товарлар учун барқарор савдо тартибини сақлаб қолиш мақсадида олиб бораётган ишлари доирасида АҚШ Оқ уйи маъмуриятига ўзаро савдо шароитларини яхшилаш бўйича аниқ таклифлар ва ташаббусларни жўнатди. Қозоғистоннинг мақсади - бозорга кириш ва савдо шартлари бўйича келишилган қарорларга эришишдир”, дея таъкидланади баёнотда.
Қайд этилишича, ҳозирда Америка томони Қозоғистон таклифларини кўриб чиқмоқда ва маслаҳатлашувлар бошланиш муддатлари ҳақида хабар беради. Қозоғистон эса ўз навбатида миллий манфаатларни ҳимоя қилиш ва АҚШ билан савдо-иқтисодий алоқаларни мустаҳкамлаш учун бўлажак музокараларга тайёргарлик кўрмоқда.
Вазирлик маълумотларига кўра, 2024 йилда Қозоғистон ва АҚШ ўртасидаги товар айирбошлаш ҳажми 4,2 миллиард долларни ташкил этди, бу 2023 йилга нисбатан 4 фоизга кўпдир. Қозоғистон экспортининг асосини хом нефть (1,1 млрд доллар), уран (322,9 млн доллар), кумуш (239,9 млн доллар), ферроқотишмалар (188,2 млн доллар), тантал ва ундан тайёрланган маҳсулотлар (17,6 млн доллар) ташкил этади. 2025 йилнинг январь—май ойларида товар айирбошлаш ҳажми 1,26 миллиард долларга етди, шундан 418,2 миллион доллари Қозоғистондан экспортга тўғри келади.
Изоҳ (0)