Ўзбекистонга четдан кириб келишда ёки бу ерга почта йўллашда божхона билан боғлиқ тушунмовчиликларга дуч келмаслик учун мамлакатга божхона тўловларисиз қайси маҳсулотларни қандай миқдорда олиб кириш мумкинлигини билиш мақсадга мувофиқ. Шу муносабат билан UzNews мазкур масалага батафсилроқ тўхталди.
Жисмоний шахслар олиб кирганда бож ундирилмайдиган товарларнинг тўлиқ рўйхати махсус меъёрий ҳужжатда келтирилган. Ундан маълум бўлишича, бир киши максимал миқдорда 2 килограмм қаҳва, 5 килограмм қандолат маҳсулотлари, 2 дона соат, 10 қути тамаки маҳсулотлари, 0,5 килограмм бижутерия олиб кириши мумкин.
Товарлар нархи қуйидаги суммаларга тенг миқдордан ошмаслиги лозим:
- 10 АҚШ доллари — қўшни мамлакатлар (Қозоғистон, Қирғизистон, Тожикистон, Афғонистон, Туркманистон) ҳудудидан олиб кирилаётган маҳсулотлар;
- 1000 АҚШ доллари — биринчи пунктда кўрсатилмаган барча давлатлардан (АҚШ, Россия ва ҳ.к.) олиб кирилаётган маҳсулотлар.
Фуқаро ўз эҳтиёжлари учун товарларни белгиланган миқдордан кўпроқ ҳажмда олиб кирганида қуйидаги тўловларни амалга оширади:
- божхона божи — божсиз олиб кириш меъёрларидан ошадиган қийматдан белгиланган ставка бўйича;
- акциз солиғи — акциз солиғи тўламай олиб кириш меъёрларидан ошадиган қийматдан белгиланган ставка бўйича;
- қўшилган қиймат солиғи — божсиз олиб кириш меъёрларидан ошадиган қийматнинг 20 фоизи миқдорида, бунга тўланиши лозим бўлган божхона божи, акциз солиғига тортиладиган товарларда эса акциз солиғи суммаси ҳам қўшилади.
Ўзбекистон Республикасида амал қилувчи қонунларга мувофиқ, қуйидаги товарларни мамлакатга олиб кириш ёки мамлакатдан олиб чиқиш тақиқланади:
- гиёҳванд ва психотроп моддалар, прекурсорлар;
- давлат ва жамият тузумига путур етказишга йўналтирилган, ҳудудий яхлитлик, сиёсий мустақиллик ва давлат суверенитетини бузадиган, уруш, террор, зўравонлик, шафқатсизлик, миллий ўзига хослик ва диний адоват, экстремизм, айримачилик, фундаментализм, ирқчилик ва унинг турларини (аксилсемитизм, фашизм) тарғиб қиладиган босма асарлар, қўлёзмалар, клише, расмлар, фотосуратлар, фототасмалар, негативлар, кино-, видео- ва аудиомаҳсулотлар, граммофон ёзувлари, овозли материаллар, шунингдек, порнографик мундарижага эга материаллар;
- портатив лазер ёриткичлари;
- портловчи ва пиротехник воситалар;
- учувчисиз учиш қурилмалари.
Изоҳ (0)