Яманда ўлим жазосига ҳукм қилинган ҳиндистонлик ҳамшира Нимиша Прия 16 июль куни қатл этилади. Бу ҳақда BBC хабар берди.
У 2017 йилда собиқ ҳамкасби Талал Абдо Маҳдини ўлдиришда айбланган. Ҳамшира жасадни бўлаклаб сув бакига ташлаган. Прия қатл этилмаслиги учун марҳумнинг оиласи уни афв этиши керак бўлади. Ҳамширанинг яқинлари ва уни қўллаб-қувватловчилари Маҳди оиласига “дияҳ” (қон тўлови) сифатида 1 миллион доллар таклиф қилган.
Биз ҳамон уларнинг афв этишларини ёки бошқа талаб қўйишларини кутмоқдамиз. Биз ҳали ҳам уни қутқаришга ҳаракат қиляпмиз, аммо охир-оқибат Маҳди оиласи розилик бериши керак, деди Нимиша Прияни қутқариш кенгаши аъзоси ва ижтимоий фаол Бабу Жон.
Прокуратура бош директори қатл санасини қамоқхона расмийларига етказган. Ҳиндистон ташқи ишлар вазирлиги вакили ҳозиргача воқеа тафсилотларини аниқлаштиришга уринишаётганини билдирган. Нимиша Прия 2008 йилда Ҳиндистоннинг Керала штатидан Яманга ҳамшира бўлиб ишлаш учун кетган. У 2017 йилда Маҳдининг жасади топилгандан сўнг қамоққа олинган. Ҳозирда 34 ёшли аёл Яман пойтахти Санъадаги марказий қамоқхонада сақланмоқда.
У Маҳдига “ҳаддан ташқари кўп тинчлантирувчи дори” бериб, кейин унинг танасини майдалаб ташлашда айбланмоқда. Ҳамшира мазкур айбловларни рад этган. Судда аёлнинг адвокати Маҳди унга жисмоний зўравонлик қилгани, пулларини олиб қўйгани, паспортини тортиб олгани ва ҳаттоки қурол билан қўрқитгани ҳақида далил келтирган.
Адвокатнинг айтишича, аёл фақат паспортини қайтариб олиш учун Маҳдини беҳуш қилмоқчи бўлган, аммо доза тасодифан ошиб кетган. 2020 йилда маҳаллий суд уни ўлим жазосига ҳукм қилган. Ҳамширанинг оиласи Яман Олий судига апелляция берган, аммо 2023 йилда уларнинг шикояти рад этилган. Январь ойи бошида ҳусийларнинг Олий сиёсий кенгаши раиси Маҳди ал-Машат аёлнинг қатл этилишини тасдиқлаган.
Изоҳ (0)