Буюк Британиядаги энг машҳур “Робин Гуд” дарахтини кесиб ташлаган икки эркакка ҳукм ўқилди. Бу ҳақда The Washington Post хабар берди.
Дарахт 1991 йилда “Робин Гуд: ўғрилар шаҳзодаси” фильмида намоён бўлгач, машҳурликка эришганди. Экспертлар унинг нархини 458 минг фунт стерлинг ёки тахминан 613 минг долларга баҳолаган. 39 ёшли Дэниэл Грем ва 32 ёшли Адам Каррутерс дарахтни 2023 йилда кесиб ташлаган. Ньюкасл қироллик суди иккита айблов бўйича эркакларни 4 йил-у уч ой қамоқ жазосига ҳукм қилган. Улар дарахтни кесиш ва деворга шикаст етказишда айбланган. Девор ЮНЕСКО объекти бўлган Адриан девори қолдиқлари ҳисобланган.
Айбланувчиларнинг иши бир йилдан ортиқ вақт давомида кўриб чиқилган, аммо расмийлар уларнинг хатти-ҳаракатлари сабабини аниқлай олмаган. Ҳукмни эълон қилиш пайтида Каррутерснинг адвокати биринчи марта сабабни аниқлашга ҳаракат қилган.
Одамлар у нега бундай ўйламай содир этилган ишни қилди?, деб сўраяпти. Афсуски, бу шунчаки маст ҳолатда содир этилган аҳмоқлик эди. Бошқа ҳеч қандай тушунтириш йўқ, деди у.
Бироқ Буюк Британия Олий суди судьяси Кристина Ламберт бунга қўшилмаган. У ҳар икки айбланувчига энг оғир тоифадаги жазо тайинланганини айтиб, дарахтнинг “ўлдирилиши” жамиятга салбий таъсири кўрсатганини айтди.
Прокурорнинг таъкидлашича, дарахтни кесиш “юқори даражадаги режалаштиришни” талаб қилган, судья буни тасдиқлаган. Гувоҳларнинг кўрсатмалари шуни кўрсатадики, кесиш “профессионал равишда амалга оширилган”. Улар катта дарахт танасини арралаш учун узун тиғли моторли аррани ўзлари билан олиб келган. Бундан ташқари, улар мўлжалланган кесиш жойини белгилаш учун бўёқ спрейидан фойдаланган.
Гремнинг адвокати Кристофер Нокс эса мижози маст ҳолатда бўлмаганини айтган. Унинг айтишича, Грем “ҳаётида жиддий муаммоларга дуч келган, муаммоларнинг барчасини ҳам ўзи юзага келтирмаган”.
Изоҳ (0)