Қашқадарё вилоятидаги тўртта туман ҳокимликлари қабул қилган норматив-ҳуқуқий ҳужжатларда “Рақобат тўғрисида”ги қонун талабларига зид ҳолатлар аниқланди. Бу ҳақда Рақобатни ривожлантириш ва истеъмолчилар ҳуқуқларини ҳимоя қилиш қўмитаси хабар берди.
Қайд этилишича, Рақобат қўмитасининг Қашқадарё вилояти ҳудудий бошқармаси томонидан 2024 йилнинг 6 ойи давомида вилоят туман ҳокимликлари ва давлат бошқарув органларининг вилоят таркибий бўлинмаларида “Рақобат тўғрисида”ги қонун талаблари юзасидан жами 10 мингдан ортиқ норматив-ҳуқуқий ва бошқа турдаги ҳужжатлар юзасидан ўрганишлар олиб борилган.
Мазкур ўрганишлар жараёнида, Нишон, Шаҳрисабз, Ғузор ва Муборак туман ҳокимликларида 19 та ҳолатда товар ёки молия бозорида рақобатни чеклашга ҳамда истеъмолчиларнинг ҳуқуқлари ва қонуний манфаатларини камситилишига олиб келувчи норматив-ҳуқуқий ва бошқа турдаги ҳужжатларни қабул қилиниши натижасида “Рақобат тўғрисида”ги қонуннинг 12, 22-моддаларида белгиланган айрим хўжалик юритувчи субъектларнинг фаолияти учун бошқа камситувчи ёки имтиёзли шарт-шароитлар яратиш ҳолатларига йўл қўйилгани аниқланган.
Юқоридаги ўрганиш натижаларига кўра, тўртта туман ҳокимларининг тегишли қарорлари қонун талабларига мувофиқлаштирилган ҳамда туман ҳокимликларига қонун бузилиши ҳолатларини бартараф этиш ва келгусида бундай ҳолатга йўл қўймаслик юзасидан тақдимномалар киритилган.
Аввалроқ Рақобат қўмитаси Фарғона вилояти ҳокимлигига кўрсатма хати юборгани, Рақобат қўмитаси заправкалардаги газ нархи бўйича эътирозлардан сўнг ўрганиш ишларини бошлагани тўғрисида хабар берилганди.
Изоҳ (0)