Qashqadaryo viloyatidagi to‘rtta tuman hokimliklari qabul qilgan normativ-huquqiy hujjatlarda “Raqobat to‘g‘risida”gi qonun talablariga zid holatlar aniqlandi. Bu haqda Raqobatni rivojlantirish va isteʼmolchilar huquqlarini himoya qilish qo‘mitasi xabar berdi.
Qayd etilishicha, Raqobat qo‘mitasining Qashqadaryo viloyati hududiy boshqarmasi tomonidan 2024-yilning 6 oyi davomida viloyat tuman hokimliklari va davlat boshqaruv organlarining viloyat tarkibiy bo‘linmalarida “Raqobat to‘g‘risida”gi qonun talablari yuzasidan jami 10 mingdan ortiq normativ-huquqiy va boshqa turdagi hujjatlar yuzasidan o‘rganishlar olib borilgan.
Mazkur o‘rganishlar jarayonida, Nishon, Shahrisabz, G‘uzor va Muborak tuman hokimliklarida 19 ta holatda tovar yoki moliya bozorida raqobatni cheklashga hamda isteʼmolchilarning huquqlari va qonuniy manfaatlarini kamsitilishiga olib keluvchi normativ-huquqiy va boshqa turdagi hujjatlarni qabul qilinishi natijasida “Raqobat to‘g‘risida”gi qonunning 12, 22-moddalarida belgilangan ayrim xo‘jalik yurituvchi subyektlarning faoliyati uchun boshqa kamsituvchi yoki imtiyozli shart-sharoitlar yaratish holatlariga yo‘l qo‘yilgani aniqlangan.
Yuqoridagi o‘rganish natijalariga ko‘ra, to‘rtta tuman hokimlarining tegishli qarorlari qonun talablariga muvofiqlashtirilgan hamda tuman hokimliklariga qonun buzilishi holatlarini bartaraf etish va kelgusida bunday holatga yo‘l qo‘ymaslik yuzasidan taqdimnomalar kiritilgan.
Avvalroq Raqobat qo‘mitasi Farg‘ona viloyati hokimligiga ko‘rsatma xati yuborgani, Raqobat qo‘mitasi zapravkalardagi gaz narxi bo‘yicha e’tirozlardan so‘ng o‘rganish ishlarini boshlagani to‘g‘risida xabar berilgandi.
Izoh (0)