Хитой Ҳиндистон ва Покистон ўртасидаги жанговар тўқнашувлардан сўнг ўз элчихоналари орқали Франциянинг Rafale қирувчи самолётлари савдосига путур етказиш учун ахборот кампаниясини бошлади. Бу ҳақда Франция разведка хизматига таяниб, Associated Press хабар берди.
Франция разведкасига кўра, Хитойнинг хориждаги элчихоналаридаги мудофаа атташелари Rafale савдосига тўсқинлик қилишга уринган. Улар самолётларга буюртма берган давлатларга уларнинг самарадорлиги ҳақида шубҳа уйғотишга ҳаракат қилган. Жумладан, Индонезияга шундай хабарлар етказилган. Харидорларга Француз самолётлари ўрнига Хитой техникасини танлаш таклиф қилинган.
Хитойнинг ахборот кампанияси ижтимоий тармоқларда тарқалаётган вирусли постлар, сунъий интеллект ёрдамида яратилган чалғитувчи тасвирлар ва жанговар ўйинлардан олинган скриншотларни ўз ичига олган, дейилади хабарда.
Разведка бу материаллар мингдан ортиқ сохта аккаунтлар орқали тарқатилганини аниқлаган. Хитой Миллий мудофаа вазирлиги бу айбловларни “асоссиз миш-мишлар ва туҳмат” деб баҳолаган.
Май ойида тўрт кун давом этган Ҳиндистон-Покистон тўқнашувлари ядро қуролига эга икки қўшни ўртасидаги йиллар давомидаги энг жиддий қарама-қаршилик бўлди. Ҳар икки томондан ўнлаб самолётлар иштирок этди. Шундан бери мутахассислар Ҳиндистон томонидан қўлланилган, жумладан, Rafale қирувчиларининг Покистоннинг Хитойда ишлаб чиқарилган ҳарбий техникасига қарши қандай натижа кўрсатганини таҳлил қилмоқда.
Rafale ва бошқа қуролларнинг савдоси Франция мудофаа саноати учун катта даромад манбаи бўлиб, Париж ҳукуматининг Осиёдаги, айниқса Хитой кучайиб бораётган минтақаларда, дипломатик алоқаларни мустаҳкамлашга хизмат қилмоқда.
Франция ички бозори учун битта Rafale самолётининг нархи тахминан 100 миллион АҚШ долларига тенг. Бироқ экспорт қилинаётган самолётлар қўшимча қуроллар, хизмат кўрсатиш пакети ва эҳтиёт қисмлар билан биргаликда 200 миллион долларгача бориши мумкин. Ҳиндистон, Бирлашган Араб Амирликлари, Қатар, Миср ва Янги Деҳли билан имзоланган шартномаларда нарх кўплаб омилларга қараб фарқ қилади.
Изоҳ (0)