Францияда Bugatti ва қирувчи самолёт ўртасида пойга уюштирилди (видео)

Bugatti компанияси 1500 от кучига эга W16 мотори ўрнатилган Chiron Sport автомобили ҳамда палуба қирувчи самолёти Dassault Rafale ўртасида ўтказилган пойга видеосини эълон қилди. Автомобиль ерда самолётга бирор имконият қолдирмаган, бироқ қирувчи ҳавога кўтарилгач, ундан ўзиб кетган, деб хабар беради Motor.

Пойгачи Chiron Sport’нинг Les Legendes du Ciel номи («Само афсонаси») остидаги «авиация» версияси иштирок этган. У ўтган юз йилликнинг бошидаги ҳам учувчи, ҳам пойгачи бўлган профессионалларга бағишланган.

Мазкур гиперкар тўртта турбокомпрессорга эга стандарт W16 мотори билан жиҳозланган. Саккиз литрли агрегат 1500 от кучи га 1600 Нм айланувчи моментни тақдим этишга қодир. «Авиация» Chiron Sport’и соатига 100 километр тезликка 2,4 сонияда эришади, максимал тезлиги — 420 километр/соат.

Dassault Rafale қирувчи самолётининг турбореактив двигатели 58 550 нютон кучни тақдим этишга қодир — бу 5727 от кучига тенг. Самолёт ва гиперкар пойгаси «7227 от кучи пойгаси» номи олган — уларнинг моторлари жами шунча от кучини тақдим этади.

Беллашув Франциядаги Ҳарбий ҳаво кучлари базасининг 1,5 километрли учиш йўлагида ташкиллаштирилган. Chiron Sport’ни ХХ асрнинг охирларида «Формула-1»да чиқиш қилган Bugatti’нинг Пьер-Анри Рафанел исмли пойгачиси бошқарган. Дастлабки сонияларда гиперкар олдинга ўтиб кетган, бироқ бир неча юз метрдан сўнг, қирувчи ердан узилган ва ҳавода автомобилни ортда қолдирган.