Германия ва Франция Европа Иттифоқидан, агар Вашингтон савдо божлари масаласида муросага келмаса, Қўшма Штатларга қарши жавоб чораларини кўришни талаб қилмоқда. Бу ҳақда Financial Times газетаси Европа Иттифоқи амалдорлари ва дипломатларига асосланиб хабар бермоқда.
“Музокаралар олиб бориш услубимизни ўзгартиришимиз зарур. Биз жавоб зарбасини беришга ва музокаралар мувозанатини ўзгартирадиган ҳар қандай вариантни таклиф қилишга қодир бўлишимиз керак”, деди Франция саноат вазири Марк Ферраччи.
23 июль куни Германия канцлери Фридрих Мерс Берлинда Франция президенти Эммануэл Макронни қабул қилган.
Иккала давлат ҳам АCI (Anti-Coercion Instrument — мажбурлашга қарши кураш воситаси, шунингдек “савдо базукаси” номи билан ҳам танилган) қўлланилишини ёқламоқда.
“Аввалроқ Bloomberg Франция ушбу савдо воситасини жорий этиш ташаббусига бошчилик қилаётгани ҳақида хабар берган эди. Шу пайтгача Берлин бу чорага эътибор бермаган, бироқ энди у Вашингтонни “қатъий жавоб билан огоҳлантириш” ва Дональд Трампга “таъсир ўтказиш воситалари”ни қўлга киритиш мақсадида Париж билан кучларини бирлаштиради”, дея таъкидлайди Financial Times.
Таъкидланишича, АCI Европа Иттифоқи ёки унинг аъзо мамлакатларини савдо ёки молиявий таҳдидлар орқали сиёсатини ўзгартиришга мажбурлаш уринишларига тезкор жавоб беришга имкон беради. Жавоб чоралари қаторида ушбу восита божларни ошириш, давлат харидларини чеклаш, инвестицияларни тақиқлаш ва экспортни назорат қилишни назарда тутади. Газета манбаларининг таъкидлашича, АCI ташаббуси дарҳол чоралар кўришга эмас, балки текширув ўтказишга олиб келади.
“Европа Иттифоқида ушбу воситанинг ишга туширилишига қарши “жим турган кўпчилик мавжуд. Ҳозирги беқарор вазиятда бу “ядро қуроли” каби бўлиши мумкин”, дейди Европа Иттифоқининг номи ошкор этилмаган дипломати.
Бошқа манбалар Вашингтоннинг Қўшма Штатлар 1 августдан бошлаб Европа Иттифоқидан келадиган товарларга 30 фоизлик божлар жорий этиши, аввалроқ киритилган секторларга оид божлар эса ўз кучида қолиши ҳақидаги баёнотидан сўнг Европа Иттифоқидаги фикр ўзгарганини айтган.
“Бу аъзо давлатлар ўртасидаги кайфиятни кескинлаштирди”, деди дипломатлардан бири.
Бундан аввал АҚШ президенти Дональд Трамп 22 июль куни Япония, Филиппин ва Индонезия билан савдо битимлари тузилганини маълум қилганди.
Изоҳ (0)