Germaniya va Fransiya Yevropa Ittifoqidan, agar Vashington savdo bojlari masalasida murosaga kelmasa, Qo‘shma Shtatlarga qarshi javob choralarini ko‘rishni talab qilmoqda. Bu haqda Financial Times gazetasi Yevropa Ittifoqi amaldorlari va diplomatlariga asoslanib xabar bermoqda.
“Muzokaralar olib borish uslubimizni o‘zgartirishimiz zarur. Biz javob zarbasini berishga va muzokaralar muvozanatini o‘zgartiradigan har qanday variantni taklif qilishga qodir bo‘lishimiz kerak”, dedi Fransiya sanoat vaziri Mark Ferrachchi.
23-iyul kuni Germaniya kansleri Fridrix Mers Berlinda Fransiya prezidenti Emmanuel Makronni qabul qilgan.
Ikkala davlat ham ACI (Anti-Coercion Instrument — majburlashga qarshi kurash vositasi, shuningdek “savdo bazukasi” nomi bilan ham tanilgan) qo‘llanilishini yoqlamoqda.
“Avvalroq Bloomberg Fransiya ushbu savdo vositasini joriy etish tashabbusiga boshchilik qilayotgani haqida xabar bergan edi. Shu paytgacha Berlin bu choraga e’tibor bermagan, biroq endi u Vashingtonni “qat’iy javob bilan ogohlantirish” va Donald Trampga “ta’sir o‘tkazish vositalari”ni qo‘lga kiritish maqsadida Parij bilan kuchlarini birlashtiradi”, deya ta’kidlaydi Financial Times.
Ta’kidlanishicha, ACI Yevropa Ittifoqi yoki uning a’zo mamlakatlarini savdo yoki moliyaviy tahdidlar orqali siyosatini o‘zgartirishga majburlash urinishlariga tezkor javob berishga imkon beradi. Javob choralari qatorida ushbu vosita bojlarni oshirish, davlat xaridlarini cheklash, investitsiyalarni taqiqlash va eksportni nazorat qilishni nazarda tutadi. Gazeta manbalarining ta’kidlashicha, ACI tashabbusi darhol choralar ko‘rishga emas, balki tekshiruv o‘tkazishga olib keladi.
“Yevropa Ittifoqida ushbu vositaning ishga tushirilishiga qarshi “jim turgan ko‘pchilik mavjud. Hozirgi beqaror vaziyatda bu “yadro quroli” kabi bo‘lishi mumkin”, deydi Yevropa Ittifoqining nomi oshkor etilmagan diplomati.
Boshqa manbalar Vashingtonning Qo‘shma Shtatlar 1-avgustdan boshlab Yevropa Ittifoqidan keladigan tovarlarga 30 foizlik bojlar joriy etishi, avvalroq kiritilgan sektorlarga oid bojlar esa o‘z kuchida qolishi haqidagi bayonotidan so‘ng Yevropa Ittifoqidagi fikr o‘zgarganini aytgan.
“Bu a’zo davlatlar o‘rtasidagi kayfiyatni keskinlashtirdi”, dedi diplomatlardan biri.
Bundan avval AQSH prezidenti Donald Tramp 22-iyul kuni Yaponiya, Filippin va Indoneziya bilan savdo bitimlari tuzilganini ma’lum qilgandi.
Izoh (0)