Туркиянинг Маниса шаҳар суди кана ўлдиришга уриниб 12 гектар ўрмонга ўт қўйган эркакни ҳибсга олди. Бу ҳақда CNN Turk хабар берди.
Гумонланувчи канани ёстиғида аниқлагач, унга ўт қўйиб, уйи олдидаги боғга отиб юборган.
“Манисадаги ёнғин аллақачон 12 гектар қишлоқ хўжалиги ерлари ва ўрмонларни йўқ қилган. Ҳодиса сабабларини ўрганган полиция гумонланувчи Ўзжон Тошхонни ҳибсга олиб, уни ёнғинда айблаган. У сўроқ пайтида ёстиқда кана топиб, уни ёқиб, боғга отиб юборганини маълум қилган”, дейилади хабарда.
Ўт ўчирувчилар 1 июль куни 9 та ўрмон ёнғинини ўчиришга ҳаракат қилган. Сўнгги 5 кун ичида мамлакатда 340 дан ортиқ ёнғин қайд этилган.
Туркиянинг шимолий вилоятлари аҳолиси ҳар йили каналардан азият чекади. Лекин бу йилги жазирама туфайли Истанбул ва Анталияда каналар кўпайган. Сивас шаҳрида йил бошидан бери 10 киши кана чақиши оқибатида Қрим-Конго геморрагик иситмаси сабаб вафот этган.
Ғарбий Измирда 29 июнь куни ўрмон ёнғинлари авж олган. Ўт ўчирувчилар ҳали ҳам ёнғинга қарши курашни давом эттирмоқда. Куюкак ва Доганбей ҳудудларидаги ўрмон ёнғинлари тунда 25-30 м/с гача бўлган кучли шамол таъсирида аланга олган. 4 та қишлоқ ва 2 та маҳалла эвакуация қилинган. Ёнғинни ўчириш учун курашаётган мингдан ортиқ одам билан бирга 122 та ўт ўчириш машинаси, 74 та сув ташувчи ва 84 та оғир техника жалб қилинган.
Изоҳ (0)