Turkiyaning Manisa shahar sudi kana o‘ldirishga urinib 12 gektar o‘rmonga o‘t qo‘ygan erkakni hibsga oldi. Bu haqda CNN Turk xabar berdi.
Gumonlanuvchi kanani yostig‘ida aniqlagach, unga o‘t qo‘yib, uyi oldidagi bog‘ga otib yuborgan.
“Manisadagi yong‘in allaqachon 12 gektar qishloq xo‘jaligi yerlari va o‘rmonlarni yo‘q qilgan. Hodisa sabablarini o‘rgangan politsiya gumonlanuvchi O‘zjon Toshxonni hibsga olib, uni yong‘inda ayblagan. U so‘roq paytida yostiqda kana topib, uni yoqib, bog‘ga otib yuborganini ma’lum qilgan”, deyiladi xabarda.
O‘t o‘chiruvchilar 1-iyul kuni 9 ta o‘rmon yong‘inini o‘chirishga harakat qilgan. So‘nggi 5 kun ichida mamlakatda 340 dan ortiq yong‘in qayd etilgan.
Turkiyaning shimoliy viloyatlari aholisi har yili kanalardan aziyat chekadi. Lekin bu yilgi jazirama tufayli Istanbul va Antaliyada kanalar ko‘paygan. Sivas shahrida yil boshidan beri 10 kishi kana chaqishi oqibatida Qrim-Kongo gemorragik isitmasi sabab vafot etgan.
G‘arbiy Izmirda 29-iyun kuni o‘rmon yong‘inlari avj olgan. O‘t o‘chiruvchilar hali ham yong‘inga qarshi kurashni davom ettirmoqda. Kuyukak va Doganbey hududlaridagi o‘rmon yong‘inlari tunda 25-30 m/s gacha bo‘lgan kuchli shamol ta’sirida alanga olgan. 4 ta qishloq va 2 ta mahalla evakuatsiya qilingan. Yong‘inni o‘chirish uchun kurashayotgan mingdan ortiq odam bilan birga 122 ta o‘t o‘chirish mashinasi, 74 ta suv tashuvchi va 84 ta og‘ir texnika jalb qilingan.
Izoh (0)