Италияда 2 июнь куни Этна вулқони отилди. Ундан катта миқдорда кул ва тутун кўтарилмоқда. Бу ҳақда BBC хабар берди.
Этна обсерваториясига кўра, интенсивлиги ортиб бораётган бир қатор портлашлар қайд этилган. Вулқон отилишининг тўлиқ кўлами ҳозирча номаълум. Вулқондан баландлиги 6,5 км га етадиган улкан вулқон кули, гази ва тоғ жинслари устуни отилиб чиқмоқда.
Этна вулқони дунёдаги энг фаол вулқонлардан бири ҳисобланиб, унинг активлашиши тез-тез қайд этилади. Орол аэропортида парвозлар бекор қилинмаган. Сўнгги активлик февраль ойида содир бўлган ва Катания аэропорти кул булутлари туфайли ўнлаб рейсларни бошқа жойларга йўналтирган эди.
Шунингдек, сайёҳлар лава оқимларидан узоқда бўлиши кераклиги ҳақида огоҳлантирилган. Олимлар аввалроқ, Италиянинг Кампи-Флегрей супервулқони ҳудудида сейсмик фаолликнинг кучайиши ҳақида огоҳлантирганди. Сўнгги олти ой ичида бу ҳудудда 3000 дан ортиқ зилзила қайд этилган, 2025 йил май ойида эса сўнгги 40 йилдаги энг кучли 4,4 магнитудали силкиниш содир бўлган. Кампи-Флегрей қадимги вулқон отилишлари натижасида ҳосил бўлган кенг калдерадир. Вулқон охирги марта 1539 йилда фаоллик кўрсатган.
Уларнинг огоҳлантиришича, супервулқоннинг уйғониши глобал ҳалокатли оқибатларга олиб келиши мумкин. Бунинг оқибатида сайёра “хаосга тушади”. Тўғридан тўғри хавф зонасида 4 миллиондан ортиқ одам, жумладан, Неапол аҳолиси қолиши мумкин.
Изоҳ (0)